पंजाब किंग्स विरुद्ध कोलकाता नाईट रायडर्स या हायव्होल्टेज सामन्यामध्ये काल पंजाब किंग्सचा विजय झाला. अजिंक्य रहाणेच्या नेतृत्त्वामध्ये कोलकाताच्या संघाला ११२ असे शक्य वाटणारे लक्ष्य गाठणे शक्य झाले नाही. केकेआरची संपूर्ण संघ ९५ धावांवर ऑलआउट झाला. सामना संपल्यानंतर केकेआरचा कर्णधार अजिंक्य रहाणेचा व्हिडीओ व्हायरल झाला. या व्हिडीओमध्ये रहाणे श्रेयस अय्यरशी मराठीत संवाद साधत असल्याचे पाहायला मिळाले.

अजिंक्य रहाणे आणि अंगकृश रघुवंशी ज्या वेळेस क्रीजवर होते, तेव्हा कोलकाता नाईट रायडर्सचा स्कोअर ६२/२ असा होता. केकेआरच्या संघाला जिंकण्यासाठी ७५ बॉल्समध्ये ५० धावा करण्याची गरज होती. युजवेंद्र चहल आठव्या ओव्हरमध्ये गोलंदाजी करत होता. त्याने रहाणेला बाद केले. पण अजिंक्य रहाणेच्या विकेटनंतर कोलकाताची फलंदाजी ढेपाळली.

सामना संपल्यानंतर जेव्हा दोन्ही संघांचे खेळाडू एकमेकांशी हस्तांदोलन करत होते. तेव्हा कोलकाताचा कर्णधार अजिंक्य रहाणे पंजाबचा कर्णधार श्रेयस अय्यरजवळ गेला आणि मराठीत काहीतरी म्हणाला. तेव्हा 'काय फालतू बॅटिंग केली ना आम्ही.' असे रहाणे म्हणाल्याचे स्टेडियममधील कॅमेऱ्यांमध्ये कैद झाले. अजिंक्य रहाणेच्या या व्हिडीओविषयी सोशल मीडियावर चर्चा सुरु आहे.

पंजाब किंग्स विरुद्धच्या सामन्यातील पराभवाची संपूर्ण जबाबदारी अजिंक्य रहाणेने घेतली. तो म्हणाला, पराभवाची जबाबदारी मी घेतो. चुकीचा शॉट मारला, मी चुकलो. मला कोणतीही जोखीम घ्यायची नव्हती. आम्ही खराब फलंदाजी केली. विकेट सोपी नव्हती तरीही १११ धावा करणे शक्य होते. गोलंदाजांनी चांगला खेळ केला. पण आम्ही काही प्रमाणात बेजबाबदारपणा दाखवला. माझ्या डोक्यात अनेक गोष्टी सुरु होत्या. मी सध्या फार निराश आहे.