आयपीएल सुरु होण्यासाठी आता फक्त १० दिवस उरले आहेत. २८ मार्चपासून या लीगला सुरुवात होणार आहे. या स्पर्धेसाठी प्रत्येक टीम तयारीला लागली आहे. मात्र काही टीम्सना दुखापतींचे ग्रहण लागल्याचं दिसतंय. दुखापत झालेले काही खेळाडू आहेत जे संपूर्ण सिझनमधून बाहेर जाण्याची शक्यता आहे. या खेळाडूंमध्ये मॅचविनर खेळाडूंचाही समावेश आहे.

हर्षित राणामुळे केकेआर अडचणीत

कोलकाता नाईट रायडर्सचा वेगवान गोलंदाज हर्षित राणा दुखापतीमुळे या सिझनमधून टीमबाहेर जाण्याची शक्यता आहे. बीसीसीआयच्या पुरस्कार सोहळ्यात तो सहभागी झाला होता. यावेळी तो कुबड्यांच्या साहाय्याने चालताना दिसला होता. यावरून त्याच्या दुखापतीची तीव्रता दिसून येते.

जोश हेजलवुडमुळे आरसीबीच्या गोलंदाजीवर परिणाम

रॉयल चॅलेंजर्स बंगळूरचा वेगवान गोलंदाज जोश हेझलवूड बऱ्याच काळापासून मैदानाबाहेर आहे. तो अजूनही पूर्णपणे फीट झालेला नाही. जर तो आयपीएलचे सुरुवातीचे सामने खेळू शकला नाही, तर आरसीबीला त्याच्या गोलंदाजी लाईनअपमध्ये बदल करावे लागू शकतात.

पॅट कमिंसची अनुपस्थिती

सनरायझर्स हैदराबादचा कर्णधार पॅट कमिन्सदेखील पूर्णपणे फीट नाही. तो सुरुवातीच्या सामन्यांमध्ये खेळू शकणार नाही, असं मानलं जातंय. त्याच्या अनुपस्थितीचा परिणाम टीमवर तसेच कर्णधारपदावर होऊ शकतो.

मथीशाच्या रूपात केकेआरला दुसरा झटका

केकेआरने ऑक्शनमध्ये मथिशा पाथिरानावर तब्बल १८ कोटी रुपये खर्च केले होते. मात्र तो आता टी-२० वर्ल्डकप दरम्यान जखमी झाला होता. आता त्याची दुखापत टीमसाठी चिंतेचा विषय बनली आहे. जर तो खेळला नाही तर टीमचं मोठं नुकसान होऊ शकतं.