पंजाब किंग्जचा स्टार फिरकी गोलंदाज युजवेंद्र चहलने चेन्नई सुपर किंग्जविरुद्ध हॅटट्रिक घेतली. त्याने आपल्या तिसऱ्या षटकात चेन्नई सुपर किंग्जच्या चार खेळाडूंना पॅव्हेलियनमध्ये परत पाठवले. यादरम्यान, त्याने त्याच्या आयपीएल कारकिर्दीतील दुसरी हॅटट्रिक घेतली. दरम्यान २०२३ नंतर आयपीएलमधील ही पहिलीच हॅटट्रिक आहे. एमए चिदंबरम स्टेडियमवर चहले आपल्या फिरकीची जादू दाखवत चेन्नई सुपर किंग्जचे दीपक हुडा, अंशुल कंबोज आणि नूर अहमद या फलंदाजांना बाद करून हॅटट्रिक पूर्ण केली.

चेन्नई सुपर किंग्जविरुद्धच्या सामन्यात युजवेंद्र चहलने तीन षटकांत ३२ धावा देत चार विकेट्स घेतल्या. चहलने डावाच्या १९ व्या षटकात एमएस धोनीलाही तंबूत पाठवलं. त्यानंतर त्याने सलग तीन चेंडूंवर तीन खेळाडूंना बाद करत आयपीएलमधील त्याने दुसऱ्यांदा हॅटट्रिक पूर्ण केली. १९ व्या षटकात युजवेंद्र चहलने दुसऱ्या चेंडूवर चेन्नई सुपर किंग्जचं आकर्षण असलेला एमएस धोनीला बाद केलं.

चौथ्या चेंडूवर चहलने दीपक हुड्डाला झेलबाद केलं. त्यानंतर पाचव्या चेंडूवर अंशुल कंबोज क्लीन बोल्ड झाला आणि त्यानंतर नूर अहमद शेवटच्या चेंडूवर मोठा शॉट खेळण्याच्या प्रयत्नात झेलबाद झाला. स्टार लेग-स्पिनर युजवेंद्र चहलने आयपीएल २०२२ मध्ये राजस्थान रॉयल्सकडून खेळताना कोलकाता नाईट रायडर्सविरुद्ध त्याची पहिली आयपीएल हॅटट्रिक घेतली.