एमएस धोनी हा क्रिकेट जगतातील दिग्गज खेळाडू आहे. त्याच्या नेतृत्त्वामध्ये टीम इंडियाने वनडे वर्ल्डकप, टी-२० वर्ल्डकप आणि चॅम्पियन्स ट्रॉफी जिंकली आहे. रोहित शर्मा, विराट कोहली यांच्यासह अनेक क्रिकेटपटू त्यांना मिळालेल्या यशाचे श्रेय धोनीला देतात. एका श्रीलंकन खेळाडूनेदेखील धोनीच्या नेतृत्त्वकौशल्याचे कौतुक केले आहे.

२००८ पासून महेंद्रसिंह धोनी हा चेन्नई सुपर किंग्सकडून आयपीएलमध्ये खेळत आहे. त्याच्या नेतृत्त्वाचा फायदा फक्त फ्रँचायझीलाच नाही तर बऱ्याच खेळाडूंनाही झाला आहे. असाच एक खेळाडू म्हणजे श्रीलंकेचा वेगवान गोलंदाज - मथीशा पाथिराना. एप्रिल २०२२ मध्ये पाथिरानाने आयपीएलमध्ये चेन्नईकडून खेळायला सुरुवात केली. २० लाख रुपयांची बोली लावून सीएसकेने त्याला संघात सामील केले.

चेन्नई सुपर किंग्सच्या यूट्यूब चॅनलवर मथीशा पाथिरानाचा व्हिडीओ पोस्ट करण्यात आला. या व्हिडीओमध्ये पाथिरानाचा क्रिकेट कारकीर्दीचा एकूण प्रवास दाखवण्यात आला आहे. व्हिडीओमध्ये पाथिरानाच्या आईवडिलांनी त्यांच्या मुलाच्या कारकीर्दीवर धोनीचा प्रभाव असल्याचे सांगितले. "एमएस धोनीसाठी आमच्याकडे शब्दच नाहीयेत. तो खरा देव आहे. मथीशा ज्याप्रमाणे त्याच्या वडिलांचा आदर करतो, तसाच तो धोनीचा देखील आदर करतो", असे वक्तव्य पाथिरानाच्या आईने केले.

"श्रीलंकेमध्ये तुम्ही माझे वडील आहात, पण भारतात एमएस धोनी माझे वडील आहे", असे मथीशा म्हणत असल्याचे त्याच्या वडिलांनी व्हिडीओमध्ये सांगितले. "एमएस धोनी यांनी माझ्यासाठी खूपकाही केले आहे, ते मला वडिलांसारखा आहेत. ज्याप्रमाणे माझ्या वडिलांनी मला घरी सपोर्ट केला, अगदीच त्याच प्रमाणे क्रिकेटच्या मैदानात धोनी यांनी मला सपोर्ट केला", असे मथीशा पाथिरानाने व्हिडीओमध्ये म्हटले.