आयपीएल 2025 च्या 13वा सामना पंजाब किंग्स आणि लखनौ सुपर जायंट्सच्या संघात होतोय. या सामन्यात पंजाबचा कर्णधार श्रेयस अय्यरने नाणेफेक जिंकून प्रथम गोलंदाजी करण्याचा निर्णय घेतला. क्षेत्ररक्षण करण्याचा श्रेयसचा निर्णय अगदी योग्य ठरला. पंजाब संघाचा स्टार गोलंदाज अर्शदीप सिंगने पहिल्याच षटकात लखनौ संघाला मोठा धक्का दिला.

पंजाब किंग्जविरुद्ध खेळल्या जात असलेल्या सामन्यात मिचेल मार्श अपयशी ठरला. दिल्ली कॅपिटल्स आणि सनरायझर्स हैदराबादविरुद्ध त्याने तडाखेबाज फंलदाजी केली होती. त्यामुळे या सामन्यातही तो अशीच फलंदाजी करताना दिसेल असं चाहत्यांना वाटलं होतं. पण अर्शदीपने चाहत्यांच्या अपेक्षांवर पाणी फेरलं.

मिचेल मार्शने दिल्ली कॅपिटल्सविरुद्ध 36 चेंडूत 72 धावा केल्या. सनरायझर्स हैदराबादविरुद्धही त्याने अर्धशतक झळकावले होते. त्यामुळे पंजाब किंग्जविरुद्धही त्याच्याकडून मोठ्या खेळीची अपेक्षा होती. मात्र अर्शदीप सिंगने आपल्या अचूक गोलंदाजीने सर्वांना चकित केले. अर्शदीपने मधल्या आणि लेग स्टंपवर मागे असलेला एक स्लो चेंडू टाकला.

मार्शने आक्रमक शॉट खेळण्याचा प्रयत्न केला, पण चेंडू त्याच्या बॅटच्या वरच्या काठाला लागला आणि हवेत गेला. मिडऑनला मार्को जेन्सनने एक सोपा झेल घेतला. त्यामुळे मार्शला खाते न उघडता पॅव्हेलियनमध्ये परतावे लागले.