इंडियन प्रीमियर लीगच्या टुर्नामेंटमध्ये आज कोलकाता नाईट रायडर्स आणि पंजाब किंग्ज यांच्यात सामना होतोय. हा सामना कोलकात्यातील ईडन गार्डन्स येथे होत आहे. या सामन्यात नाणेफेक जिंकल्यानंतर पंजाबने प्रथम फलंदाजी करण्याचा निर्णय घेतला. नाणेफेक जिंकून प्रथम फलंदाजी करणाऱ्या पंजाब किंग्जची सुरुवात चांगली झाली.

प्रभसिमरन सिंग आणि प्रियांश आर्य यांनी सलामीवीर फलंदाज म्हणून मैदानात कहर केला. कोलकाता संघाच्या गोलंदाजांची जबरदस्त धुलाई केली. या दोघांनी १२० धावांची मोठी भागीदारी केली. पंजाब किंग्जच्या संघाने २० षटकांत ४ गडी गमावत २०१ धावा केल्या. या सामन्यात पंजाब किंग्जकडून प्रभसिमरन सिंगने ८३ धावांची खेळी केली, तर प्रियांश आर्यने ६९ धावा केल्या. केकेआरकडून गोलंदाजीत वैभव अरोराने २ विकेट्स घेतल्या.

प्रियांश आर्यने ३५ चेंडूत ६९ धावांची धमाकेदार खेळी केली. रसेल गोलंदाजी करायला आला तेव्हा १२ व्या षटकात त्याची विकेट पडली. आर्यने ८ चौकार आणि ४ षटकार मारत ६९ धावा केल्या. तर प्रभसिमरननेही स्फोटक फलंदाजी करत ३८ चेंडूत अर्धशतक झळकावलं. अर्धशतकानंतर त्याने स्फोटक फलंदाजी चालू ठेवली. त्याने ४९ चेंडूत ८३ धावा केल्या. मात्र १५ व्या षटकात त्याची विकेट पडली.