Jason Roy In Kolkata Knight Riders : दुखापतीमुळं नियमित कर्णधार श्रेयस अय्यर आयपीएलमधूनच बाहेर झाल्यानंतर कोलकाता नाइट रायडर्स संघात कोणाची एन्ट्री होणार? या प्रश्नाचं उत्तर आता मिळालं आहे. कोलकाता संघानं जेसन रॉयला संघात घेतलं आहे.

कोलकाताने जेसन रॉयला (Jason Roy) त्याच्या बेस प्राइस दीड कोटीपेक्षा जास्त पैसे मोजून म्हणजेच २.८० कोटी रुपयांना खरेदी करून आपल्या संघात घेतले आहे. नियमित कर्णधार श्रेयस अय्यर या स्पर्धेतून बाहेर झाला आहे. त्याची जागा आता जेसन रॉय घेणार आहे. (Latest sports updates)

पाठीच्या दुखापतीमुळे श्रेयस अय्यर संपूर्ण आयपीएल स्पर्धेला मुकला आहे. कोलकातासाठी हा मोठा झटका मानला जात आहे. अय्यरवर लंडनमध्ये शस्त्रक्रिया होणार आहे, असे सांगितले जाते. याशिवाय बांगलादेशचा हरफनमौला खेळाडू शाकिब यंदाच्या आयपीएलमधील काही सामने खेळू शकणार नाही.

इंग्लंड क्रिकेट संघातील विस्फोटक फलंदाज म्हणून ओळखला जाणारा जेसन रॉय आतापर्यंत आयपीएलचे १३ सामने खेळला आहे. त्याने ३० च्या सरासरीने आणि १२३.९६ च्या स्ट्राइक रेटने ३२९ धावा केल्या आहेत. याआधी २०२१ मध्ये जेसन हा सनरायझर्स हैदराबाद संघाकडून खेळला होता.

यंदाच्या आयपीएलमध्ये प्रत्येक संघातील जखमी खेळाडूंची संख्या वाढली आहे. त्यामुळे प्रत्येक संघाची डोकेदुखी वाढली आहे. त्यात कोलकाता नाइट रायडर्स संघाला अनेक झटके बसले आहेत. श्रेयस अय्यर दुखापतीमुळे खेळू शकणार नाही, तर अनुभवी अष्टपैलू खेळाडू शाकिब आयर्लंडविरुद्धच्या मालिकेमुळे सुरुवातीचे काही सामने खेळू शकणार नाही