भारतीय संघाचे मुख्य प्रशिक्षक बदल आहेत. होय तु्म्ही जे वाचत आहात ते अगदी बरोबर आहे. टीम इंडियाचा हेड कोच बदलणार आहे. झिम्बाब्वे दौऱ्यादरम्यान गौतम गंभीरच्या जागी माजी क्रिकेटपटू व्ही.व्ही.एस. लक्ष्मण भारतीय संघाच्या मुख्य प्रशिक्षकाची जबाबदारी स्वीकारणार आहे. लक्ष्मण केवळ झिम्बाब्वे मालिकेसाठीच नव्हे, तर २०२६ च्या आशियाई क्रीडा स्पर्धेसाठीही मुख्य प्रशिक्षक म्हणून काम पाहणार आहे. विशेष म्हणजे व्ही.व्ही.एस. लक्ष्मण हे बीसीसीआयच्या 'सेंटर ऑफ एक्सलन्स'चे (COE) प्रमुख आहेत.

टीम इंडियाला मिळणार वेगळे मुख्य प्रशिक्षक

जपानमध्ये १९ सप्टेंबर ते ४ ऑक्टोबर या कालावधीत आशियाई क्रीडा स्पर्धा होणार आहेत. या स्पर्धेसाठीचा भारतीय संघाची घोषणा बीसीसीआयने याआधीच केली आहे. या स्पर्धेसाठी भारतीय संघ जपानला रवाना होणार आहे. याच काळात वेस्ट इंडीजचा संघ भारताच्या दौऱ्यावर येणार आहे. भारत आणि वेस्ट इंडीज यांच्यात २७ सप्टेंबर ते १७ ऑक्टोबर दरम्यान तीन एकदिवसीय (ODI) आणि पाच टी-२० सामने खेळले जाणार आहेत.

आशियाई खेळ आणि भारत-वेस्ट इंडिज मालिका एकाचवेळी होणार असल्यानं गौतम गंभीर वेस्ट इंडिज मालिकेसाठीच्या एकदिवसीय संघात सामील होणार आहे. दरम्यान श्रेयस अय्यरच्या नेतृत्वाखालील टी-२० संघ व्ही.व्ही.एस. लक्ष्मण यांच्या मार्गदर्शनाखाली आशियाई खेळांमध्ये सहभागी होणार आहे. त्याआधी झिम्बाब्वे दौऱ्याची जबाबदारीही लक्ष्मण यांच्यावर सोपवण्यात आली आहे.

इतकेच नाही तर झिम्बाब्वे दौऱ्यासाठी भारतीय संघाच्या सपोर्ट स्टाफमध्येही काही बदल केले जातील. भारताचे माजी फिरकीपटू सुनील जोशी गोलंदाजी प्रशिक्षक म्हणून काम पाहतील, तर हृषिकेश कानिटकर फलंदाजी प्रशिक्षक असतील. आशियाई क्रीडा स्पर्धेसाठीही हाच कोचिंग स्टाफ भारतीय संघासोबत जाण्याची शक्यता आहे.

झिम्बाब्वे दौऱ्याचे वेळापत्रक

भारतीय संघाचा झिम्बाब्वे दौरा २३ जुलै ते २६ जुलै या कालावधीत होणार आहे. यात दोन्ही संघांदरम्यान तीन टी-२० सामने खेळवले जातील. पहिला सामना २३ जुलैला दुसरा २५ जुलैला आणि तिसरा २६ जुलैला होणार आहे. हे तिन्ही सामने हरारे येथे खेळवले जाणार आहेत.