श्रीलंकेविरुद्द होणाऱ्या टी २० आणि वनडे मालिकेसाठी भारतीय संघाची निवड झाली आहे. मात्र, टीम इंडियाच्या निवडीवर माजी क्रिकेटपटू हरभजन सिंग यानं प्रश्नचिन्ह उपस्थित केले आहेत. संजू सॅमसन, अभिषेक शर्मा आणि युजवेंद्र चहल यांसारख्या खेळाडूंना स्थान न दिल्यानं त्याला आश्चर्याचा धक्का बसला आहे.

भारतीय संघ जुलैच्या अखेरीला श्रीलंकेविरुद्ध टी २० आणि वनडे मालिका खेळणार आहे. २७ जुलैपासून या दौऱ्याला सुरुवात होणार आहे. गौतम गंभीर मुख्य प्रशिक्षक म्हणून पहिल्यांदाच संघासोबत श्रीलंका दौऱ्यावर जाणार आहे.

अजित आगरकरच्या अध्यक्षतेखाली निवड समितीनं झिम्बाब्वेविरुद्धच्या टी २० सामन्यांत शतक ठोकणाऱ्या अभिषेक शर्मा आणि तडाखेबंद खेळी करणाऱ्या संजू सॅमसनला (एकदिवसीय मालिका) संघात स्थान दिलेलं नाही. निवड समितीच्या या निर्णयानं हरभजन सिंगला आश्चर्याचा धक्का बसला आहे.

संजू सॅमसननं आपल्या अखेरच्या वनडेमध्ये दक्षिण आफ्रिकेविरुद्ध शतक झळकावलं होतं. हरभजन सिंगनं युजवेंद्र चहलचाही यावेळी उल्लेख केला. त्याला तर टी २० आणि वनडे यापैकी कोणत्याच फॉरमॅटमध्ये स्थान देण्यात आलेले नाही. चहल टी २० वर्ल्डकपमध्ये संघात होता. पण त्याला एकाही सामन्यात खेळण्याची संधी मिळाली नाही.

श्रीलंकेविरुद्धच्या मालिकांसाठी टीम इंडियाची घोषणा झाल्यानंतर हरभजन सिंगनं ट्विट करून तीव्र नाराजी व्यक्त केली. युजवेंद्र चहल, संजू सॅमसन आणि अभिषेक शर्मा या तिघांना श्रीलंका दौऱ्यासाठी भारतीय संघात स्थान का देण्यात आलं नाही, याचं आश्चर्य वाटतं. यामुळं मी स्वतः हैराण झालो आहे, असं हरभजननं म्हटलं आहे.

रोहित शर्मा आणि विराट कोहलीने टी २० आंतरराष्ट्रीय क्रिकेटमधून निवृत्ती घोषित केली आहे. त्यानंतर निवड समितीनं सूर्यकुमार यादवकडे टी २० संघाचं नेतृत्व सोपवलं आहे. तर शुभमन गिल याला दोन्ही फॉरमॅटमध्ये उपकर्णधार म्हणून नेमले आहे.