भारताचा कर्णधार शुभमन गिल सध्या खोऱ्यानं धावा ओढतोय. इंग्लंडविरुद्धच्या कसोटी मालिकेत तो धावांची बरसात करतोय. नवनवीन विक्रमांनाही तो गवसणी घालतोय. इंग्लंडविरुद्धच्या पाचव्या आणि अखेरच्या ओव्हल कसोटीच्या पहिल्या दिवशीही त्यानं नवं शिखर गाठलंय. एकाच कसोटी मालिकेत सर्वाधिक धावा करणारा भारतीय कर्णधार ठरला आहे. त्यानं याबाबतीत विराट कोहलीलाही मागे टाकलंय. विराट कोहलीनं २०१६ मध्ये ६५५ धावा केल्या होत्या.

युवा कर्णधार शुभमन गिलनं ओव्हल कसोटीच्या पहिल्या डावातच क्रिकेटमधील दोन दिग्गजांना मागे टाकलं आहे. गॅरी सोबर्स आणि सुनील गावसकर यांचा विक्रम त्यानं मोडीत काढलाय. ओव्हलच्या मैदानात फलंदाजी करताना दोन धावा काढताच गिल यानं गॅरी सोबर्स यांना मागं टाकलं. तर ११ धावा केल्यानंतर सुनील गावसकर यांना मागे टाकत भारताचा क्रमांक एकचा कर्णधार ठरला आहे.

शुभमन गिलनं ११ धावा केल्यानंतर एका कसोटी मालिकेत भारतीय कर्णधार म्हणून सर्वाधिक धावा केल्या आहेत. अशी कामगिरी करणारा तो नंबर १ भारतीय कर्णधार ठरलाय. सुनील गावसकर यांनी वेस्ट इंडीजविरुद्ध एका कसोटी मालिकेत ७३२ धावा केल्या होत्या. आता गिल हा अव्वल क्रमांकावर विराजमान झाला आहे. इतकेच नाही तर, गिलने SENA देशांमध्ये एका मालिकेत सर्वाधिक धावा करणारा यशस्वी कर्णधार होण्याचा मानही मिळवला आहे.

शुभमन गिल आणखी विक्रम करणार

शुभमन गिलच्या नावावर आणखी दोन विक्रम होण्याची शक्यता आहे. सुनील गावसकर यांनी एका मालिकेत ७७४ धावा केल्या होत्या. आता शुभमन गिल हा या विक्रमाला गवसणी घालण्यापासून काहीच धावा दूर आहे. जर गिलने ८११ धावा केल्या तर डॉन ब्रॅडमन यांनाही मागे टाकेल. ब्रॅडमन यांच्या नावावर एकाच मालिकेत इंग्लंडमध्ये सर्वाधिक धावा करण्याचा विक्रम आहे. हा विक्रम मागील ९० वर्षांपासून कायम आहे. आता गिल हा रेकॉर्ड मोडू शकतो.