नवी दिल्ली : भारत (Team India) आणि ऑस्ट्रेलियामध्ये (Australia) ३ सामन्यांची टी-२० मालिका सुरू आहे. मालिकेतील पहिला सामना हा मोहालीत खेळवण्यात आलाय. तर दुसरा सामना उद्या म्हणजेच 23 सप्टेंबर रोजी नागपुरात होणार होणार आहे. याव्यतिरिक्त तिसरा आणि शेवटचा टी-२० सामना हैदराबाद येथे होणार आहे. मात्र, याआधीच हैदराबादमध्ये मोठा गदारोळ झालाय.

पोलिसांनी सामन्याचे तिकीट खरेदी करण्यासाठी आलेल्या लोकांवर लाठीचार्ज केलाय. या लाठीचार्जमध्ये जवळपास ७ जण जखमी झाल्याची माहिती आहे. प्राप्त माहितीनुसार, हैदराबादमध्ये होणाऱ्या तिसऱ्या टी-२० सामन्याचे तिकीट खरेदी करण्यासाठी लोकांनी तुफान गर्दी केली होती.

३ वर्षानंतर प्रथमच हैदराबाद येथे सामना होणार असल्याने तिकीट खरेदीसाठी जवळपास २० हजारांहून अधिक क्रिकेटप्रेमी मैदानाबाहेर जमले होते. या सामन्याचा आनंद लुटता यावा म्हणून लोकांनी पहाटे ३ वाजेपासूनच तिकीट खरेदीसाठी लांबच लांब रांगा लावल्या होत्या.

दरम्यान, बघता, बघात गर्दी वाढतच गेली आणि जमाव नियंत्रणाबाहेर गेला. जमावावर नियंत्रण मिळवण्यासाठी पोलिसांना लाठीमार करावा लागला. पोलिसांनी लाठीचार्ज सुरू करताच गोंधळ उडाला आणि चेंगराचेंगरी झाली. यामध्ये ४ महिला ३ पुरूष आणि एका पोलीस कर्मचाऱ्यासह एकूण ७ जण जखमी झाले आहेत.

हैदराबादमध्ये चाहते बऱ्याच काळापासून आंतरराष्ट्रीय क्रिकेट मॅचची वाट पाहत होते. ३ वर्षानंतर २५ सप्टेंबरला त्यांची ही प्रतिक्षा संपणार आहे. विराट कोहली, रोहित शर्मा, केएल राहुल आणि अन्य स्टार्सना पाहण्यासाठी चाहते आतुर आहेत. हैदराबादमध्ये शेवटचा आंतरराष्ट्रीय सामना डिसेंबर २०१९ मध्ये वेस्ट इंडिज विरुद्ध झाला होता. त्यानंतर एकही आंतरराष्ट्रीय मॅच झालेली नाही.