भारताचे पहिले नेत्रहीन आयर्नमॅन निकेत श्रीनिवास दलाल यांचे निधन झाले आहे. १ जुलै रोजी सकाळी त्यांचा मृतदेह छत्रपती संभाजीनगर येथील एका हॉटेलच्या पार्किंगमध्ये आढळला. निकेत दलाल हे हॉटेलच्या दुसऱ्या मजल्यावरुन खाली पडल्याचे तपासातून समोर आले आहे. हा अपघात इतका गंभीर होता की, खाली पडल्यानंतर निकेत यांचा जागीच मृत्यू झाला.

पोलिसांनी दिलेल्या माहितीनुसार, ३० जूनच्या रात्री निकेत यांच्या घराला अचानक आग लागली. मित्रांनी निकेत यांना घरातून सुरक्षितपणे बाहेर काढले. मित्रांच्या सल्ल्याने निकेत यांनी हॉटेलमध्ये राहण्याचा निर्णय घेतला. रात्री अडीच वाजता ते हॉटेलमध्ये पोहोचले. ही रात्र त्यांच्या आयुष्यातील शेवटची रात्र ठरेल यांची कोणालाही कल्पना नव्हती. सकाळी ८ च्या सुमारास हॉटेल कर्मचाऱ्यांना निकेत यांचा मृतदेह पार्किंगमध्ये आढळला. निकेत यांचा मृत्यू अपघातामुळे झाला असे म्हटले जात आहे.

२०२० मध्ये निकेत दलाल यांनी आयर्नमॅन ७०.३ ट्रायथलॉन पूर्ण केले होते. ट्रायथलॉनमध्ये १.९ किमी स्विमिंग, ९० किमी सायकलिंग आणि २१.१ किमी रनिंग यांचा समावेश आहे. ही कामगिरी करणारे निकेत दलाल हे भारतातील पहिले आणि जगातील पाचवे नेत्रहीन ट्रायथलीट आहेत. ते स्पीच थेरपिस्ट होते. याशिवाय त्यांना अनेक खेळात रस होता.

२०१५ मध्ये ग्लूकोमा नावाच्या एका आजाराने निकेत यांची दृष्टी गेली होती. अंधत्त्वावर मात करत निकेत दलाल यांनी लक्षणीय कामगिरी केली. आयर्नमॅन ट्रायथलॉन व्यतिरिक्त निकेत यांनी राष्ट्रीय स्तरावरील जलतरण स्पर्धांमध्ये अनेक पदके मिळवली आहे. निकेत यांच्या आई लता दलाल या छत्रपती संभाजीनगरच्या माजी महापौर होत्या. निकेत दलाल यांच्या निधनामुळे क्रीडा जगतात हळहळ व्यक्त केली जात आहे.