भारताने झिम्बाब्वेविरुद्धच्या टी-20 सिरीजची सुरुवात विजयाने केली. पहिल्याच सामन्यात भारताने 7 विकेट्स राखून झिम्बाब्वेचा पराभव करत सिरीजमध्ये 1-0 अशी आघाडी घेतली. 126 रन्सचं लक्ष्य टीम इंडियाने अवघ्या 13.2 ओव्हर्समध्ये पूर्ण केलं. या विजयाचा खरा हिरो युवा फलंदाज वैभव सूर्यवंशी ठरला. त्याच्या तुफानी अर्धशतकामुळे भारताने सामना सहज सामना आपल्या नावावर केला. सिरीजमधील दुसरा सामना आता 25 जुलै रोजी खेळवला जाणार आहे.

वैभव सूर्यवंशीची आक्रमक फलंदाजी

भारताच्या डावाची सुरुवात वैभव सूर्यवंशीने आक्रमक फलंदाजी करत केली. मात्र अभिषेक शर्मा अवघ्या एका रनवर बाद झाला. त्यानंतर वैभवने झिम्बाब्वेच्या गोलंदाजांची धुलाई करत केवळ 18 चेंडूत अर्धशतक झळकावलं. मात्र अर्धशतक पूर्ण केल्यानंतरच्या पुढच्याच चेंडूवर त्याची खेळी संपुष्टात आली. दुसऱ्या बाजूला ईशान किशननेही टीमला चांगली साथ दिली. त्याने 24 बॉल्समध्ये 35 रन्स करताना 3 चौकार आणि 2 सिक्स लगावलेत.

याआधी टॉस गमावल्यानंतर प्रथम फलंदाजी करणाऱ्या झिम्बाब्वेचा डाव 20 ओव्हर्समध्ये 7 बाद 125 रन्सवर आटोपला. वेस्ले मधेवेरेने सर्वाधिक 39 रन्सची खेळी केली. भारताकडून मयंक यादव आणि प्रिन्स यादव यांनी प्रत्येकी दोन विकेट्स घेत झिम्बाब्वेच्या फलंदाजीवर लगाम घातला. शिवम दुबे आणि रवी बिश्नोई यांनीही प्रत्येकी एक विकेट घेत त्यांना चांगली साथ दिली.

सामन्यात भारतीय कर्णधार श्रेयस अय्यरने टॉस जिंकून प्रथम गोलंदाजीचा निर्णय घेतला. या सामन्यात अशोक शर्माने भारताकडून टी-20 आंतरराष्ट्रीय क्रिकेटमध्ये पदार्पण केलं. भारताला पहिल्याच ओव्हरमधील पहिल्या चेंडूवर विकेट मिळाली. मयंक यादवने ब्रायन बेनेटला ईशान किशनकरवी कॅच आऊट केलं. त्यानंतर प्रिन्स यादवने बेन करनला बाद केलं.

मयंक यादवने पुन्हा एकदा अचूक मारा करत डायोन मायर्सला बाद केले. मोठा फटका खेळण्याच्या प्रयत्नात त्याने चेंडू थेट शिवम दुबेच्या हातात मारला. मायर्सला 14 चेंडूत केवळ 6 रन्स करता आले. झिम्बाब्वेचा कर्णधार सिकंदर रजा देखील फार काळ टिकू शकला नाही. तो फक्त 4 रन्स करून शिवम दुबेच्या गोलंदाजीवर बाद झाला.

रवी बिश्नोईने भारताला आणखी एक महत्त्वाचं यश मिळवून दिलं. रायन बर्ल मोठा फटका खेळण्याच्या प्रयत्नात सीमारेषेजवळ तिलक वर्माच्या अप्रतिम कॅचचा शिकार ठरला. बर्लने 35 चेंडूत 26 रन्स केले. मात्र त्याची खेळी टीमला मोठ्या स्कोरपर्यंत पोहोचवू शकली नाही.