महिला आशिया चषक 2024 चा अंतिम सामना भारत आणि श्रीलंका संघांमध्ये रंगिरी डंबुला आंतरराष्ट्रीय स्टेडियमवर खेळला गेला. या सामन्यात मोठी चुरस पहायला मिळाली. पण शेवटी श्रीलंकेच्या संघाने भारतीय संघाला मात दिली. श्रीलंकेने क्रिकेट इतिहासात प्रथमच महिला आशिया कपचे विजेतेपद पटकावलं आहे. श्रीलंका आशिया चषक जिंकणारा भारत आणि बांगलादेशनंतरचा तिसरा महिला संघ बनला आहे.

भारतीय कर्णधार हरमनप्रीत कौरने नाणेफेक जिंकून प्रथम फलंदाजी करण्याचा निर्णय घेतला होता. मात्र सलामीवीर शेफाली वर्माला 16 धावांत माघारी परतली. त्यांनंतर स्मृती मानधनाने चांगली फलंदाजी केली असली तरी, स्ट्राईट रेट खूपच कमी राहिला. तीने 47 चेंडूत 10 चौकार ठोकत 60 धावा केल्या. रिचा घोषचाही दमदार परफॉर्मन्स पाहायला मिळाला. तिने अवघ्या 14 चेंडूत 4 चौकार आणि 1 षटकारासह 30 धावांचं योगदान दिलं. जेमिमाह रॉड्रिग्जनेही 16 चेंडूत 29 धावांचं योगदान दिले. त्यामुळे टीम इंडियान 20 षटकांत 6 विकेट गमावून 165 धावांच लक्ष्य गाठता आलं.

प्रत्युत्तरात मैदानात उतरलेल्या 166 धावांचा पाठलाग करताना श्रीलंकेच्या फलंदाजांनी अप्रतिम कामगिरी केली. सुरुवातीला श्रीलंकेने 7 धावांवर पहिली विकेट गमावली. मात्र त्यांची दुसरी विकेट 94 धावांवर पडली. चमारी अटापट्टूने पुन्हा एकदा श्रीलंकेसाठी दमदार खेळी केली. चमारी अटापट्टूने 43 चेंडूत 61 धावा केल्या. ज्यामध्ये 9 चौकार आणि 2 षटकारांचा समावेश आहे. हर्षिता समरविक्रमानेही अप्रतिम फलंदाजी केली. हर्षितानेही अर्धशतक झळकावलं, 51 चेंडूत 69 धावा करत संघाला विजयापर्यंत पोहोचवलं.

महिला आशिया कपची ही 9वी टुर्नामेंट होती. या स्पर्धेतील फायनलमध्ये टीम इंडियाचा पराभव झाला आहे. याआधी भारताने 8 पैकी 7 वेळा आशिया कप विजेतेपद पटकावलं आहे. 2018 मध्ये बांगलादेशने फायनलमध्ये टीम इंडियाचा पराभव केला होता. यानंतर ही दुसरी वेळ आहे टीम इंडिया आशिया कप विजेतेपदापर्यंत पोहोचता आलेलं नाही.