चेन्नई सुपर किंग्जचा माजी कर्णधार महेंद्रसिंग धोनी रिटायर कधी होणार या प्रश्नाचं उत्तर अजूनही चाहत्यांना मिळालेलं नाही. दरम्यान आतापर्यंत धोनी स्पष्टपणे याबाबत बोलला देखील नाही. मात्र नुकतंच धोनीने या प्रश्नाचं उत्तर दिलं आहे. चेन्नई सुपर किंग्जचा स्टार आणि माजी भारतीय खेळाडू एमएस धोनीने त्याच्या निवृत्तीच्या अफवांच्या पार्श्वभूमीवर एका पॉडकास्टमध्ये मोठं विधान केलं आहे.

झालं असं की, ५ एप्रिल २०२५ रोजी दिल्ली कॅपिटल्स आणि चेन्नई सुपर किंग्ज यांच्यातील आयपीएल सामन्यादरम्यान एमए चिदंबरम स्टेडियममध्ये धोनीचे आई-वडील आले होते. त्यामुळे यंदाच्या आयपीएलनंतर धोनी निवृत्ती घेणार अशी अटकळ बांधण्यात येतेय. धोनीने त्याच्या आयपीएल निवृत्तीबाबत सर्व काही स्पष्ट केलंय. यासोबतच त्याने एक मोठा खुलासाही केला आहे.

धोनी यावर्षी घेणार का निवृत्ती?

राज शमानी यांच्यासोबतच्या पॉडकास्टमध्ये धोनीने निवृत्तीच्या अफवांबद्दल खुलासा केला. त्याने चाहत्यांना आश्वासन दिलंय की, तो यंदाच्या सिझननंतर त्याच्या आयपीएल कारकिर्दीला निरोप देणार नाहीये. ४४ व्या वर्षीही तो खेळू शकेल की नाही हे जाणून घेण्यासाठी तो त्याच्या शरीराला ८ महिने देणार आहे, असं धोनीने सांगितलं. पुढील सिझनच्या सुरुवातीला त्याचं शरीर खेळण्यासाठी योग्य असेल तर तो खेळत राहील.

रिटायरमेंटबाबत धोनी म्हणाला, नाही, आता नाही. मी अजूनही आयपीएल खेळतोय. मी ते एका वेळी एका वर्षाचा हिशोब घेतो. मी ४३ वर्षांचा असून २०२५ आयपीएल संपेपर्यंत मी ४४ वर्षांचा असणार आहे. त्यामुळे त्यानंतर मी पुढे खेळायचे की नाही हे ठरवण्यासाठी माझ्याकडे १० महिने आहेत. पण हे मी ठरवत नाही, तर माझे शरीर ठरवतं.

इंटरनॅशनल क्रिकेटमधून धोनीची निवृ्त्ती

ऑगस्ट २०२० मध्ये धोनीने आंतरराष्ट्रीय क्रिकेटमधून निवृत्तीची घोषणा केली होती. तेव्हापासून तो फक्त आयपीएलमध्ये क्रिकेट खेळतो. धोनी त्याचा १८ वा आयपीएल सिझन खेळतोय पण चेन्नई सुपर किंग्जने ४ कोटी रुपयांना रिटेन केल्यानंतर अनकॅप्ड खेळाडू म्हणून हा त्याचा पहिलाच सिझन आहे.

देशासाठी खेळण्यावर काय म्हणाला धोनी?

धोनीच्या म्हणण्यानुसार, 'मी कधीही विचार केला नव्हता की मी देशासाठी खेळेन. मी रांचीमध्ये राहत होतो. आमच्या टीमचा क्रिकेट कारकिर्दीचा इतिहास नाही. मी शाळेत असताना कधीच विचार केला नव्हता की एक दिवस भारतासाठी खेळेन. आम्ही शाळेत असताना टेनिस बॉलने खेळायचो आणि मी त्यावेळी गोलंदाजी करायचो. मी त्यावेळी खूप लहान आणि बारीकही होतो. त्यानंतर मला विकेटकीपिंग करायला सांगण्यात आलं.

माझ्या वयाची खूप कमी मुलं त्यावेळी क्रिकेट खेळायची. माझ्यापेक्षा मोठ्या लोकांसोबत क्रिकेट खेळणं माझ्यासाठी खूप महत्वाचे होते. याशिवाय मी दुसरं काहीही केलं नाही. मला माझ्या वडिलांची खूप भीती वाटत होती. तो नेहमीच वेळेचे पक्के होते आणि मी देखील त्यांच्यासारखाच आहे, असंही धोनीने म्हटलंय.