भारतीय संघातील वेगवान गोलंदाज मोहम्मद शमी हा वनडे वर्ल्डकप २०२३ स्पर्धेत गोलंदाजीत हिरो ठरला होता. तो या स्पर्धेत सर्वाधिक गडी बाद करणारा गोलंदाज ठरला होता. ही स्पर्धा झाल्यानंतर तो भारतीय संघातून बाहेर पडला होता. तेव्हापासून ते आतापर्यंत भारतीय संघात कमबॅक करु शकलेला नाही. दरम्यान त्याच्या कमबॅकबाबत एक मोठी अपडेट समोर आली आहे. (Mohammed Shami)

सप्टेंबरमध्ये होणार मोहम्मद शमीचं कमबॅक

ईएसपीएन क्रिकइन्फोने दिलेल्या वृत्तानुसार, मोहम्मद शमी येत्या सप्टेंबर महिन्यात कमबॅक करु शकतो. येत्या सप्टेंबर महिन्यात बांगलादेशचा संघ भारत दौऱ्यावर येणार आहे. दोन्ही संघांमध्ये २ कसोटी सामन्यांची मालिका रंगणार आहे. असं म्हटलं जात आहे की, मोहम्मद शमी या मालिकेतून कमबॅक करताना दिसून येऊ शकतो.

मात्र त्याला संघात कमबॅक करण्यापूर्वी स्वत:ची फिटनेस सिद्ध करावी लागणार आहे. जर तो फिटनेस टेस्टमध्ये पास झाला, तर तो बांगलादेशविरुद्धच्या कसोटी मालिकेत खेळताना दिसेल. बांगलादेशविरुद्ध होणाऱ्या कसोटी मालिकेपूर्वी मोहम्मद शमी दिलीप ट्रॉफी स्पर्धेत खेळताना दिसेल.

बीसीसीआयचे मुख्य निवडकर्ते अजित आगरकर यांनी काही दिवसांपूर्वी झालेल्या पत्रकार परिषदेत बोलताना म्हटले होते की, जे खेळाडू दुखापतग्रस्त आहेत. ते पूर्णपणे फिट होण्याची प्रतीक्षा आहे. मोहम्मद शमीने मैदानात उतरुन सराव करायला सुरुवात केली आहे.

मोहम्मद शमीची कारकिर्द

भारतीय संघातील वेगवान गोलंदाज मोहम्मद शमी तिन्ही फॉरमॅटमध्ये भारतीय संघाचं प्रतिनिधित्व करतो. त्याने ६४ कसोटी सामन्यांमध्ये आतापर्यंत २२९ गडी बाद केले आहेत. तर वनडे क्रिकेटमध्ये त्याने आतापर्यंत १०१ सामने खेळले आहेत. यादरम्यान त्याने १९५ गडी बाद केले आहेत. त्याला वनडे क्रिकेटमध्ये २०० गडी बाद करण्याची संधी आहे. तर टी-२० क्रिकेटमध्ये त्याने २३ सामन्यांमध्ये १२७ गडी बाद केले आहेत.