आयसीसी चॅम्पियन्स ट्रॉफी २०२५ स्पर्धा सुरु व्हायला अवघे काही दिवस शिल्लक राहिले आहेत. या स्पर्धेला येत्या १९ फेब्रुवारीपासून सुरुवात होणार आहे. या स्पर्धेतील सामने पाकिस्तान आणि यूएईत रंगणार आहेत.

पाकिस्तान आणि भारताला वगळलं तर उर्वरीत सर्वच संघांनी आपल्या संघाची घोषणा केली आहे. माध्यमातील वृत्तानुसार, येत्या १९ जानेवारीला भारतीय संघाची घोषणा केली जाऊ शकते. त्यामुळे कोणाला संधी मिळणार आणि कोणाचा पत्ता कट होणार? अशी चर्चा रंगायला सुरुवात झाली आहे.

भारतीय टी-२० संघातील स्टार फलंदाज संजू सॅमसनने गेल्या काही टी -२० मालिकांमध्ये आपल्या फलंदाजीचा ठसा उमटवला आहे. टी-२० क्रिकेटमध्ये हिट ठरत असला तरीदेखील वनडे क्रिकेटमध्ये त्याला आपलं स्थान निश्चित करता आलेलं नाही.

त्याचा सध्याचा फॉर्म पाहता त्याला वनडे संघात स्थान देण्याची मागणी जोर धरत आहे. मात्र आता संजूच्या फॅन्सचं टेन्शन वाढवणारी बातमी समोर येत आहे.

संजूला पुन्हा एकदा डच्चू मिळणार?

पीटीआयच्या वृत्तानुसार, दमदार फॉर्ममध्ये असणाऱ्या संजू सॅमसनला चॅम्पियन्स ट्रॉफीसाठी भारतीय संघात स्थान मिळण्याची शक्यता खूप कमी आहे. आयसीसी वनडे वर्ल्डकप २०२३ स्पर्धेत केएल राहुलची यष्टीरक्षक फलंदाज म्हणून निवड केली गेली होती. मात्र आता त्याला फलंदाज म्हणून संघात स्थान दिले जाऊ शकते. तर रिषभ पंतला यष्टीरक्षक फलंदाज म्हणून स्थान दिलं जाण्याची शक्यता वर्तविली जात आहे. तर बॅकअप यष्टीरक्षक म्हणून ध्रुव जुरेलला संधी दिली जाऊ शकते.

संजू सॅमसनच्या वनडे कारकिर्दीबद्दल बोलायचं झालं, तर त्याने २०२१ मध्ये पदार्पण केलं होतं. त्याला या फॉरमॅटमध्ये १६ सामने खेळण्याची संधी मिळाली आहे. यादरम्यान त्याला ५६.७ च्या सरासरीने ५१० धावा करता आल्या आहेत. ज्यात १ शतक आणि ३ अर्धशतकांचा समावेश आहे.