Mayank Yadav News: आयपीएल २०२४ स्पर्धेत आपल्या वेगवान गोलंदाजीने सर्वांचं लक्ष वेधून घेणाऱ्या मयांक यादवला भारतीय संघात संधी देण्यात आली आहे. बांगलादेशविरुद्ध झालेल्या पहिल्या टी-२० सामन्यात त्याला पदार्पण करण्याची संधी दिली गेली होती.

या सामन्यातील पहिल्याच षटकातील सर्व चेंडू त्याने ताशी १४० किमीच्या गतीने टाकले. यादरम्यान त्याने एकही धाव खर्च केली नव्हती. त्यानंतर दुसऱ्याच षटकात त्याने बांगलादेशचा अनुभवी फलंदाज महमदुल्लाहला माघारी धाडलं. दरम्यान दुसऱ्या सामन्याआधी बांगलादेशच्या कर्णधाराने मयांक यादवबद्दल मोठं वक्तव्य केलं आहे.

मयांक यादवने आपल्या पहिल्याच आंतरराष्ट्रीय सामन्यात शानदार गोलंदाजी केली. त्याने ४ षटक गोलंदाजी केली. यादरम्यान त्याने २१ धावा खर्च केल्या आणि १ गडी बाद केला. त्याची ही शानदार कामगिरी पाहता तो दुसऱ्या सामन्यातही खेळताना दिसून येऊ शकतो.

दरम्यान मयांक यादवबाबत विचारण्यात आलेल्या प्रश्नाबाबत बोलताना, बांगलादेशचा कर्णधार शांतो म्हणाला की, 'आमच्या नेट्समध्ये असे गोलंदाज आहेत. त्यामुळे आम्हाला त्याच्या गोलंदाजीतील गतीचं टेन्शन नव्हतं. मात्र तो एक चांगला गोलंदाज आहे.'

मालिकेतील पहिल्या सामन्याबाबत बोलायचं झालं, तर या सामन्यात भारतीय संघाने नाणेफेक जिंकला आणि प्रथम गोलंदाजी करण्याचा निर्णय घेतला. प्रथम फलंदाजी करण्यासाठी आलेल्या बांगलादेशचा डाव अवघ्या १२७ धावांवर आटोपला. या धावांचा पाठलाग करताना भारतीय संघाने ७ गडी राखून शानदार विजय मिळवला.

मालिकेतील पहिला सामना जिंकून भारतीय संघाने ३ टी-२० सामन्यांच्या मालिकेत १-० ने आघाडी घेतली आहे. मालिकेतील दुसरा सामना आज दिल्लीतील अरुण जेटली स्टेडियमवर रंगणार आहे. हा सामना जिंकून भारतीय संघ मालिकेत २- ० ने विजयी आघाडी घेण्याच्या प्रयत्नात असणार आहे. तर बांगलादेशचा संघ मालिकेत कमबॅक करण्याच्या प्रयत्नात असणार आहे.