India W vs Sri Lanka W Asian Games 2023 Cricket Final Highlights:

चीनमध्ये सुरू असलेल्या आशियाई क्रीडा स्पर्धेत भारतीय खेळाडूंचा दबदबा पाहायला मिळत आहे. या स्पर्धेत भारताला आणखी एक सुवर्णपदक मिळालं आहे. भारताच्या रणरागिनींनी भारताला क्रिकेटमध्ये सुवर्णपदक मिळवून दिलं आहे.

सोमवारी(२५ सप्टेंबर) झालेल्या महिला क्रिकेट स्पर्धेच्या अंतिम फेरीत भारतीय महिला संघाने श्रीलंकेला पराभूत करत सुवर्णपदकाची कमाई केली आहे. तर उपविजेत्या श्रीलंकेला रौप्यपदकावर समाधान मानावे लागले आहे.

या सामन्यात भारतीय संघाने नाणेफेक जिंकून प्रथम फलंदाजी करण्याचा निर्णय घेतला होता. भारतीय संघाकडून प्रथम फलंदाजी करताना स्मृती मंधानाने ४५ चेंडूंचा सामना करत ४ चौकार आणि १ षटकाराच्या साहाय्याने ४६ धावांची खेळी केली.

तर जेमीमा रॉड्रिग्जने ४० चेंडूंचा सामना करत ५ चौकारांच्या साहाय्याने ४२ धावांची खेळी केली. या खेळीच्या बळावर भारतीय संघाने २० षटकअखेर ७ गडी बाद ११६ धावा केल्या. (Latest sports updates)

श्रीलंकेला सुवर्णपदक जिंकण्यासाठी केवळ ११७ धावा करायच्या होत्या. या धावांचा पाठलाग करण्यात श्रीलंकेचा संघ अपयशी ठरला आहे. श्रीलंकेला २ ० षटकअखेर ८ गडी बाद केवळ ८७ धावा करता आल्या.

श्रीलंकेकडून हसीनी परेराने २२ चेंडूंचा सामना करत २५ धावांची खेळी केली. तर नीलाक्षी डी सिल्वाने २३ धावांचे योगदान दिले. भारतीय संघाकडून गोलंदाजी करताना तितास साधुने अवघ्या ६ धावा करत ३ गडी बाद केले. तर राजेश्वरी गायकवाडने २,दिप्ती शर्मा, पुजा वस्त्राकर आणि देविका वैद्यने प्रत्येकी १-१ गडी बाद केला.

भारतीय संघाची दमदार कामगिरी..

भारतीय संघाने गेल्या काही महिन्यांपासून दमदार कामगिरी केली आहे. २०२२ मध्ये झालेल्या कॉमनवेल्थ गेम्समध्ये भारतीय महिला क्रिकेट संघाने रौप्यपदकावर नाव कोरलं होतं. अंतिम सामन्यात भारतीय संघाला ऑस्ट्रेलियाकडून पराभवाचा सामना करावा लागला होता. आता आशियाई क्रीडा स्पर्धेत भारतीय संघाने सुवर्णपदक पटकावलं आहे.