गुजरातच्या सूरतमध्ये सोशल मीडियावर खतरनाक स्टंटसाठी प्रसिद्ध इन्फ्लुएन्सरबाबत धक्कादायक वृत्त हाती आलं आहे. १८ वर्षीय प्रसिद्ध इन्फ्लुएन्सर प्रिन्स पटेल याचा भीषण अपघातात मृत्यू झाला आहे.

गुजरातच्या उधना-मगदल्ला रोडजवळील अणुव्रत गेटच्या ओव्हरब्रिजवर अपघाताची घटना घडली आहे. इन्फ्लुएन्सर प्रिन्सच्या अपघाताचा सीसीटीव्ही फुटेज समोर आलं आहे. सीसीटीव्हीमध्ये दिसत आहे की, 'इन्फ्लुएन्सरने दुचाकीवरील नियंत्रण गमावलं. त्यानंतर रस्त्यावर कोसळून डिव्हाडरवर धडकला'.

प्रत्यक्षदर्शीने दिलेल्या माहितीनुसार, भीषण अपघातात इन्फ्लुएन्सर प्रिन्सला गंभीर दुखापत झाली. त्यानंतर पुढील काही वेळात प्रिन्सचा जागीच मृत्यू झाला. प्रिन्सचा अपघात पाहून प्रत्यक्षदर्शी देखील हादरून गेले होते. त्याने दुचाकी चालवताना हेल्मेट न घातल्यामुळे मृत्यू झाल्याचे पोलीस तपासात समोर आलं आहे.

प्रिन्स पटेल यांनी सोशल मीडियावर 'PKG Blogger' नावाने अॅक्टिव्ह होता. तो त्याच्या KTM बाईकला प्रेमाने लैला बोलायचा. तो स्टंट आणि वेगाने बाईक चालवण्याचा रील तयार करायचा. दोन दिवसांपूर्वी प्रिन्स पटेल याने रील बनवला होता. त्याने स्वर्गाविषयी रील बनवला होता. त्याने स्वर्गाचा रील बनवल्यानंतर दोन दिवसांनी दुर्दैवाने मृत्यू झाला आहे.

प्रिन्स पटेलच्या मृत्यूने त्याच्या कुटुंबावर दु:खाचा डोंगर कोसळला आहे. प्रिन्स एकुलता एक होता. त्याची आई दूध विक्री करून कुटुंबाचा उदारनिर्वाह करत होती. प्रिन्स मोठा झाल्यावर कुटुंबाचा आधार होईल, असे तिच्या आईला वाटत होते. मात्र, वेगाने घराचा आधार हिरावून घेतला. दहावीपर्यंत शिक्षण घेतलेल्या प्रिन्सचा मृत्यू झाल्याने कुटुंबाला मोठा धक्का बसला आहे.