छत्तीसगडमधून धक्कदायक बातमी समोर आली आहे. एका महिलेने स्वतःच्या पतीची हत्या करून मृतदेह बॅगेत लपवल्याची घटना घडली आहे. धक्कदायक म्हणजे या महिलेने स्वतःच्या मुलीला फोन करून सांगितले की, मी तुझ्या वडिलांचा खून केला आहे आणि मृतदेह घरी सूटकेसमध्ये आहे. या घटनेप्रकरणी महिलेला पोलिसांनी बेड्या ठोकल्या असून पुढील तपास सुरु केला आहे. या हत्येनंतर परिसरात भीतीचे वातावरण निर्माण झाले आहे.

मिळालेल्या माहितीनुसार, सदर घटना छत्तीसगडमधील जशपूर जिल्ह्यातील दुलदुला पोलीस स्टेशन परिसरासरातील भिंजपूर गावात घडली आहे. गावातील रहिवासी असलेल्या संतोष भगत आणि त्याची पत्नी मंगरुता भगत या दोघांमध्ये वारंवार वाद होत होते. काही दिवसांपूर्वी मंगरुता मुंबईहून गावी परतली. त्यांनतर भगत जोडप्यामध्ये मोठा वाद झाला. या वादातून संतापलेल्या मंगरुताने तिच्या पतीला लोखंडी हातोड्याने मारहाण केली.

हत्येनंतर तिने मृतदेह लपवण्याचा प्रयत्न केला. मंगरुताने संतोषचा मृतदेह ब्लँकेटमध्ये गुंडाळला, लाल ट्रॉली बॅगमध्ये भरला आणि घरात लपवला. त्यानंतर तिने तिच्या मधल्या मुलीला फोन करून सर्व काही सांगितले. "मी तुझ्या वडिलांचा खून केला आहे आणि मृतदेह घरी सूटकेसमध्ये आहे,". आईचे बोलणे ऐकून मुलगी घाबरली. ती ताबडतोब तिच्या पतीसोबत गावात परतली आणि तिच्या काकांना घडलेला प्रकार सांगितला. तिच्या काकांनी ताबडतोब दुलदुला पोलिसांना कळवले.

पोलिस पथक घटनास्थळी पोहोचले आणि त्यांनी घराची झडती घेतली. झडतीदरम्यान त्यांना एक ट्रॉली बॅग सापडली, जी उघडताच संतोष भगतचा मृतदेह आढळून आला. मृतदेह ब्लँकेटमध्ये गुंडाळलेला होता आणि चेहऱ्यावर आणि हातावर रक्ताचे डाग होते. कुटुंबीयांनी सांगितले की मंगरुता मुंबईत काम करत होती आणि काही दिवसांपूर्वी गावी परतली होती. हत्येनंतर ती पुन्हा मुंबईला पळून गेली. घटनेची माहिती मिळताच एसएसपी शशी मोहन सिंह देखील घटनास्थळी पोहोचले. त्यांनी सांगितले की मृताच्या भावाच्या तक्रारीवरून दुलदुला पोलिस ठाण्यात गुन्हा दाखल करण्यात आला आहे.