हरियाणात विधानसभा निवडणुकीसाठी मतदानाची प्रक्रिया पूर्ण झाली आहे. अनेकांचं भवितव्य मतपेटीत बंद झाल्यानंतर अनेक एक्झिट पोल समोर आले आहेत. ज्यामध्ये हरियाणात काँग्रेसचे सरकार स्थापन होणार असल्याचा दावा करण्यात आला आहे. आता हायकमांड भूपेंद्र हुडा यांच्याकडे राज्याची धुरा सोपवणार की धक्कादायक निर्णय घेऊन कुमारी शैलजा यांच्या नावाची घोषणा करणार, हा प्रश्न आहे.

हरियाणात सध्या फक्त 2 चेहरे आहेत. यापैकी एकाचे नाव हायकमांड जाहीर करेल, असे मानले जात आहे. एक्झिट पोलनुसार हरियाणात काँग्रेसला बंपर जागा मिळताना दिसत आहेत. एक्झिट पोलचे आकडे जाहीर झाल्यानंतर काँग्रेसचे भूपेंद्र सिंह हुड्डा माध्यमांसमोर आले आहेत. मुख्यमंत्रीपद त्यांनाच मिळेल, असा त्यांना आत्मविश्वास आहे.

ते म्हणाले आहेत की, 8 ऑक्टोबर रोजी निकाल जाहीर होणार आहेत. त्यानंतर सीएलपीची बैठक होईल. यानंतर हायकमांड ठरवणार मुख्यमंत्री कोण होणार. हुड्डा म्हणाले की, राज्यात काँग्रेसची लाट आहे. प्रचंड बहुमताने सरकार स्थापन होणार आहे. 2005 ते 2014 पर्यंतच्या आमच्या सरकारने चांगलं काम केलं. तसेच 2014-2024 मधील सरकारचे अपयश जनतेला माहीत आहे. काँग्रेसचे सरकार आल्यास बेरोजगारी, महिला सुरक्षा आणि शिक्षणावर काम केले जाईल.

मुख्यमंत्रिपदाबाबत हुड्डा म्हणाले की, ही लोकशाही आहे, प्रत्येकाला या पदावर दावा करण्याचा अधिकार आहे. हायकमांड जो काही निर्णय घेईल, तो त्यांना मान्य आहे. कुमारी शैलजा यांच्या दाव्याबाबत विचारले असता त्यांनी सांगितले की, त्या (कुमारी शैलजा) आमच्या ज्येष्ठ नेत्या आहेत.

दरम्यान, यावेळी कुमारी शैलजा तिकीट वाटपाबाबत संतप्त दिसल्या. सूत्रांनी दिलेल्या माहितीनुसार, हुड्डा यांनी आपल्या समर्थकांना 73 तिकिटांचे वाटप केल्याची चर्चा राजकीय वर्तुळात होती. अशातच काँग्रेस हुड्डा यांना राज्याची धुरा देणार की, हायकमांड वेगळा काही निर्णय घेणार हे येत्या 48 तासांत स्पष्ट होईल.