इबोला आणि झिका व्हायरसनंतर आता दक्षिण आफ्रिकेतील आणखी एका विषाणूने सर्वांची झोप उडवली आहे. मध्य आफ्रिकेतील कॉन्गोमध्ये विषाणूमुळे काही दिवसांत ५० हून अधिक जणांचा मृत्यू झाला आहे. जागतिक आरोग्य संघटनेने नव्या विषाणूपासून सावध केलं आहे. नव्या विषाणूमुळे गेल्या ४८ तासांत अनेक जणांनी जीव सोडले आहेत.

कॉन्गोमध्ये २१ जानेवारी रोजी नव्या विषाणूविषयी माहिती समोर आली. नव्या विषाणूने आतापर्यंत ४१९ लोक बाधित झाले आहेत. ९ फेब्रुवारी रोजी बोमेटे शहरात मृतांचा आकडा वाढू लागला आहे. जागतिक आरोग्य संघटनेनुसार, बोलोको शहरात तीन मुलांनी वटवाघूळ खाल्ले होते. त्यामुळे त्यांना ताप आला होता. त्यानंतर ४८ तासांनंतर त्यांचा मृत्यू झाला.

मागील काही वर्षात आफ्रिका आणि आशिया सारख्या भागात प्राण्यांपासून माणसांमध्ये आजार बळावू लागले आहेत. जागतिक आरोग्य संघटनेनुसार, २०२२ साली मागील दशकात दक्षिण आफ्रिकेत या प्रकारच्या आजारांमध्ये ६० टक्क्यांहून अधिक मोठी वाढ झाली आहे. आफ्रिकी देश कॉन्गोमध्ये गूढ आजाराने आतापर्यंत ५० हून अधिक जणांचा मृत्यू झाला आहे. जागतिक आरोग्य संघटनेच्या माहितीनुसार, नव्या विषाणूची लागण होताच रुग्ण जीव सोडत आहेत. गुढ आजारामुळे सर्वत्र खळबळ उडाली आहे.

मीडिया रिपोर्टनुसार, काही महिन्यांपूर्वी देखील काँगोमध्ये फ्लू सारख्या आजाराने खळबळ उडवून दिली होती. गुढ आजारामुळे १५० लोकांचा मृत्यू झाला होता. काँगोमधील पांजी राज्यातील मागील वर्षीच्या १० नोव्हेंबर ते २५ नोव्हेंबरदरम्यान गुढ आजाराने अनेकांचा मृत्यू झाला होता. त्यात लहान मुले आणि महिलांचा समावेश होता. गुढ आजाराचे लक्षणे हे ताप, डोकेदुखी, खोकला आणि अॅनिमिया आहेत.