Vrindavan Banke Bihari Temple : मथुरेतील वृंदावन शहरातील बांके बिहारी मंदिरामध्ये हाणामारी झाली. दर्शनासाठी दिल्लीहून आलेले भाविक आणि सुरक्षा रक्षकांमध्ये जुंपली. या हाणामारीमध्ये एका महिलेसह दोन भाविक जखमी झाले. सुरक्षा रक्षकांनी मारहाण आणि शिवीगाळ केल्याचा आरोप भाविकांनी केला आहे. भाविकांनी असभ्य वर्तन केल्याचे सुरक्षा रक्षकांनी म्हटले आहे. या हाणामारीची व्हिडीओ सोशल मीडियावर व्हायरल झाला आहे.

मिळालेल्या माहितीनुसार, दिल्लीच्या शालीमार गार्डन येथील रहिवासी अशोक सभलोक सोमवारी (८ सप्टेंबर) दुपारी आपल्या कुटुंबासह बांके बिहारी मंदिरात दर्शनासाठी पोहोचले होते. दर्शनासाठी जात असताना सुरक्षा रक्षक राकेश आणि महेश चंद्र यांनी भाविकांना पुढे जाण्यास सांगितले. याचा राग अशोक सभलोक यांना आला. त्यानंतर मंदिराचे सुरक्षा रक्षक आणि अशोक सभलोक यांचे कुटुंबीय यांच्या वाद सुरु झाला. वादाचे रुपांतर हाणामारीत झाली.

अशोक यांची पत्नी रेणू यांनी माहिती दिली. त्या म्हणाल्या, मंदिरात अजिबात गर्दी नव्हती. आम्ही बांके बिहारी लाल यांचे दर्शन घेण्यासाठी गेलो होतो. काळ्या कपड्यांमध्ये असलेल्या सुरक्षा रक्षकांनी आणि तिथे उपस्थित असलेल्या काही पोलिसांनी धक्काबुक्की केली. आम्हाला शिवीगाळ केली, केस ओढले आणि खाली फेकले. सभलोक यांनी या प्रकरणी वृंदावन पोलीस ठाण्यात तक्रार दाखल केली.

दुसऱ्या बाजूला, बांके बिहारी मंदिराचे प्रभारी खासगी सुरक्षा रक्षक अटल बाबू यांनी सुरक्षा रक्षकांची बाजू मांडली. सुरक्षा रक्षक भाविकांना पुढे जाण्यासाठी सांगत होते. यावरुन दोघांमध्ये वाद झाला. भाविकांनी सुरक्षा रक्षकांशी गैरवर्तन केले, मारहाण केली. या प्रकरणी आम्ही पोलिसांकडे तक्रार दाखल केली आहे, असे अटल बाबू यांनी सांगितले.