Vidhan Sabha Election BJP performance : पाच राज्यातील विधानसभा निवडणुकीचा कल आता जवळपास स्पष्ट झाला आहे. १५ वर्षानंतर पश्चिम बंगालमध्ये सत्तांतर झाले असून भाजपने मोठ्या विजयाकडे वाटचाल केली आहे. भाजप तब्बल १९५ जागांवर आघाडीवर आहे, तर दुसरीकडे आसाममध्येही भाजपचा एकतर्फी विजय निश्चित झाला असून ९८ जागांवर आघाडी घेतली आहे. पद्दुचेरीमध्येही कमळ फुललेय. पण २ राज्यात मात्र भाजपचा दारूण पराभव झाला आहे. केरळ आणि तामिळनाडूमध्ये भाजपला पराभवाचा सामना करावा लागलाय. या दोन राज्यात नेमकं काय झालं? कुणाचं सरकार आले? भाजपला किती जागा मिळणार? हे जाणून घेऊयात..

थलापती विजयच्या वादळात भाजपसह सर्वांचाच सुपडासाफ

अभिनेता विजय यांनी अभिनयाला रामराम ठोकत राजकारणात एन्ट्री केली. पहिल्याच निवडणुकीत विजय यांना न भूतो न भविष्यति असे यश मिळाले. २३४ जागांपैकी विजय यांच्या टीव्हीकेनं ११२ जागांवर आघाडी घेतली. विजय यांच्या वादळात सत्ताधारी आणि विरोधक भूईसपाट झाले. भाजपचाही सुपडासाफ झाला. डीएमके ५० तर एआयडीएमकेला फक्त ५८ जागा मिळतील. तामिळनाडूमध्ये भाजपला खातेही उघडता आले नाही. एकही उमेदवार भाजपचा आघाडीवर नसल्याचे चित्र आहे.

केरळमध्ये डाव्यांचा गड कोसळला, काँग्रेस सत्तेत; भाजपचा पराभव

केरळमध्येही सत्तांतर झाले असून डाव्यांचा गड कोसळला आहे. काँग्रेस आघाडीने ९४ पेक्षा जास्त जागांवर आघाडी घेत सत्तास्थापनेकडे वाटचाल केली आहे. १४० जागांच्या विधानसभा निवडणुकीत भाजपला फक्त २ जागांवर यश मिळाले आहे. तर सत्ताधारी डाव्या आघाडीला फक्त ४० जागा मिळतील, असा अंदाज वर्तवला जात आहे.

पश्चिम बंगालमध्ये ममतांचा पराभव?

पश्चिम बंगालमध्ये १५ वर्षानंतर सत्तांतर होण्याची शक्यता आहे. २९४ जागांपैकी भाजप तब्बल १९३ जागांवर आघाडीवर आहे. तर ममता बॅनर्जी यांच्या टीएमसी फक्त ९३ जागांवर आघाडीवर आहे. तर काँग्रेसला बंगालमध्ये एकही जागा मिळालेली नाही.

आसाममध्ये भाजप पुन्हा सत्तेत

आसाममध्ये भाजपने १२६ पैकी ९८ जागांवर आघाडी घेतली असून पुन्हा सत्तेत येणार आहेत. तर काँग्रेसला फक्त २४ जागा मिळालया आहेत. पद्दुचेरीमध्येही कमळ फुलले असून ३० पैकी १६ जागांवर आघाडी घेतली आहे. काँग्रेसला १० जागा मिळाल्या आहेत.