उत्तर प्रदेशच्या फतेहपूर जिल्ह्यात खळबळजनक घटना घडली आहे. सुट्टी न मिळाल्याने लग्नाच्या एक दिवस आधीच ऑडिटरने आयुष्य संपवल्याची घटना उघडकीस आली आहे. ऑडिटरने टोकाचं पाऊल उचलल्याने लग्न घरी शोककळला पसरली आहे. आयुष्य संपवलेल्या २५ वर्षीय ऑडिटरच्या नातेवाईकांनी कार्यालयातील महसूल निरीक्षकावर कारवाईची मागणी केली आहे.

सुधीर कुमार कोरी असे ऑडिटरचं नाव आहे. सुधीर हा बिंदकी तालुक्यात नोकरीला होता. सुधीरची ड्युटी ही एसआयआरमधील जहानाबाद विधानसभा मतदारसंघात लागली होती. सहा महिन्यापूर्वी त्याचं लग्न ठरलं होतं. त्याच्या लग्नाची वरात सीतापूर गावात जाणार होती. घरातील नातेवाईकांनी मोठ्या जल्लोषात लग्नाची तयारी केली होती. सुधीरच्या लग्नामुळे घरात आनंदाचं वातावरण होतं. मात्र, सुधीरने टोकाचा निर्णय घेतल्याने सारं दु:खात बदललं.

कुटुंबाचा आरोप आहे की, कार्यालयातील महसूल निरीक्षक हा त्याच्यावर दबाव टाकत होता. सुधीरची बहीण अमृता उर्फ रोशनीच्या अनुसार, लग्नासाठी सुट्टी मागितली होती. परंतु लग्नासाठी सुट्टी दिली नाही. एक दिवस ड्युटी न केल्याने नोकरीतून निलंबित करण्यात येईल, असं कार्यालयातील महसूल निरीक्षकाने सांगितलं.

अमृताने पुढे सांगितलं की, सकाळच्या सुमारास त्याच्या कार्यालयातील महसूल निरीक्षक घरी आला होता. त्यावेळी देखील तो सुधीरवर ओरडला. त्यानंतर सुधीर एका खोलीत गेला. खोलीत गेल्यानंतर त्याने दरवाजा बंद करून घेतला. काही वेळाने खोलीच्या खिडकीत डोकावून पाहिल्यानंतर त्याने आत्महत्या केल्याचे आढळले.

सुधीरच्या मावस भावाने सांगितलं की, 'कार्यालयातील महसूल निरीक्षकाने कामासाठी दबाव टाकला. यामुळे मानसिक तणावात गेलेल्या सुधीरने आयुष्य संपवलं. त्याच्या तोंडातून रक्त देखील पडत होते.

पोलिसांकडून तपास सुरु

घटनेची माहिती मिळताच आयकर विभागाचं पथक आणि जिल्हाधिकारी घटनास्थळी पोहोचले. नातेवाईकांनी महसूल निरीक्षक आणि संबंधित दोषी अधिकाऱ्यांवर कारवाईची मागणी केली आहे. सध्या पोलीस आणि प्रशासनाचे अधिकारी घटनास्थळी पोहोचले असून नातेवाईकांची समजूत काढण्याचा प्रयत्न करत आहेत.