उत्तर प्रदेशची राजधानी लखनऊमधून धक्कादायक बातमी समोर येत आहे. एका तरूणाने आपल्या प्रेयसीच्या घरात घुसून तिच्यावर गोळीबार केला. सुदैवाने तरूणीचे प्राण वाचले. गोळी तिच्या हाताला लागली असल्याची माहिती आहे. ही घटना पारा पोलीस स्टेशन परिसरात घडली असून, शुक्रवारी ही घटना उघडकीस आली. सध्या तरूणीवर खासगी रूग्णालयात उपचार सुरू आहेत.

आकाश कश्यप असे आरोपी प्रियकराचे नाव आहे. तर, लक्ष्मी थापा असे गोळीबार झालेल्या जखमी तरूणीचे नाव आहे. पारा येथील काशीराम कॉलनीत राहणाऱ्या लक्ष्मी थापा यांची मोठी बहीण राधिका थापा यांनी पोलीस ठाण्यात दाखल केलेल्या तक्रारीनुसार, पारा पोलिसांनी आरोपीविरोधात गुन्हा दाखल केला आहे. पोलीस आरोपीचा शोध घेत आहेत.

मिळालेल्या माहितीनुसार, पीडित तरूणी आणि तरूणाचे पूर्वी प्रेमसंबंध होते. परंतु, नंतर मुलीचे ब्रेकअप झाले. गेल्या वर्षभरापासून महिलेनं आरोपीशी बोलणे बंद केले होते. त्याच्याशी संबंध तोडले होते. यामुळे संतप्त होऊन आरोपीनं हे कृत्य केलं. सध्या तरूणीची प्रकृती गंभीर असल्याची माहिती आहे. तिच्यावर रूग्णालयात उपचार सुरू आहे.

सध्या पोलिसांकडून आरोपीचा शोध सुरू आहे. या घटनेनंतर परिसरात खळबळ उडाली असून, पुढील तपास पोलिसांकडून सुरू आहे.