उत्तर प्रदेशातून संतापजनक घटना समोर आली आहे. वीटभट्टीवर काम करणाऱ्या एका विधवा महिलेवर सलग १२ तास सामूहिक बलात्कार करण्यात आला आहे. धक्कादायक म्हणजे वीटभट्टी मालकाने आणि त्याच्या मित्रांनी मिळून हे घाणेरडं कृत्य केलं आहे. नराधमाच्या तावडीतून सुटका करून घेत महिलेने पोलीस ठाणे गाठले आणि आरोपींविरोधात तक्रार दाखल केली. या घटनेने गावात खळबळ उडाली आहे.

मिळालेल्या माहितीनुसार, आरोपीचं नाव विजय कुशवाहा असे आहे. काही दिवसांपूर्वी पीडित महिलेच्या पतीचं निधन झालं. त्यानंतर महिलेने वीटभट्टीवर काम करण्यास सुरुवात केली. तिच्या एकटेपणाचा फायदा घेत वीटभट्टी मालकाची तिच्यावर वाईट नजर पडली.

९ फेब्रुवारी रोजी रात्री विजय कुशवाहा याने दोन साथीदारांसह कारमधून या महिलेचे अपहरण केले. त्यानंतर तिला पडरौना येथील एका खोलीत डांबून ठेवण्यात आले. तिथेच सलग १२ तास तिच्यावर अत्याचार करण्यात आले. हे तिघे ही आळीपाळीने तिच्यावर अत्याचार करत राहीले.

महिलेने संधी मिळताच त्यांच्या तावडीतून आपली सुटका करून घेतली. त्यानंतर महिलेने थेट पोलीस ठाणे गाठले. याप्रकरणी पोलीस ठाण्यात तक्रार दाखल करण्यात आली असून या घटनेतील मुख्य आरोपी अद्याप फरार आहे. पोलीस या घटनेचा अधिक तपास करत आहेत. दरम्यान महिलेला न्याय मिळणार का? हे पाहणं महत्त्वाचं ठरले. तसेच या घटनेने पुन्हा एकदा महिलांच्या सुरक्षिततेचा प्रश्न ऐरणीवर आला आहे.