लखनौ : उत्तर प्रदेशातील बाराबंकी येथे एक मोठी दुर्घटना घडली आहे. जिल्ह्यातील मोहम्मदपूर खला परिसरात सुमाली नदीत एक बोट बुडाली आहे. या बोटीत 25 हून अधिक जण प्रवास करत होते. मिळालेल्या माहितीनुसार या अपघातात तिघांचा मृत्यू झाला आहे. मात्र अद्याप मृतांची ओळख पटलेली नाही.

अपघातानंतर पोलीस आणि स्थानिक रहिवाशी घटनास्थळी पोहोचले असून त्यांनी मदतीने बचावकार्य सुरू आहे. आतापर्यंत 20 लोकांना नदीतून सुखरूप बाहेर काढण्यात आले असून, त्यापैकी 7 जणांना रुग्णालयात पाठवण्यात आले आहे. नदीपलीकडील गावात कुस्तीचे सामने सुरू असल्याचे सांगण्यात येत आहे. कुस्ती पाहण्यासाठी सर्व लोक बोटीने सामुली नदी ओलांडून जात होते. त्यानंतर बोट मध्यभागी येताच तोल बिघडला आणि बोट उलटली.

मृतांच्या नातेवाईकांना 4-4 लाख रुपयांची मदत

राज्याचे मुख्यमंत्री योगी आदित्यनाथ यांनी ट्वीट करून या घटनेवर शोक व्यक्त केला आहे. यासोबतच त्यांनी पीडित कुटुंबांना तातडीने मदत देण्याचे निर्देश दिले आहेत. मृतांच्या नातेवाईकांना आपत्ती निधीतून प्रत्येकी चार लाख रुपये देण्याची घोषणा जिल्हाधिकाऱ्यांनी केली आहे.

जिल्हाधिकारी अविनाश कुमार यांनी सांगितले की, सालपूर गावातील 20 लोक बोटीने नदी पार करत होते. अचानक बोटीचा तोल बिघडला आणि क्षमतेपेक्षा जास्त जण उपस्थित असल्याने बोट उलटली. कुमार यांनी सांगितले की, बोटीतील 13 लोक पोहत बाहेर आले, मात्र सात जण पाण्यात बुडू लागले होते.