अमेरिकेचे राष्ट्रध्यक्ष डोनाल्ड ट्रम्प यांनी एक मोठा निर्णय घेतला आहे. मात्र हा निर्णय अमेरिकेत काम करणाऱ्या भारतीयांना अडचणीत आणणणारा ठरला आहे. भारतीयांकडून मागणी असलेल्या एच-१ बी व्हिसासाठी आता १ लाख डॉलर्स म्हणजेच साधारण ८८ लाख रुपये इतकं वार्षिक शुल्क आकारण्याचा निर्णय ट्रम्प यांनी घेतला आहे. यामुळे तीन लाख भारतीयांना शुल्कवाढीचा फटका बसणार आहे. या निर्णयामुळे एका भारतीय तरुणाचं लग्न मोडल्याचा धक्कादायक प्रकार घडला आहे.

डोनाल्ड ट्रम्प यांनी व्हिसा धोरणात मोठा बदल केला असून यापुढे एच १बी या व्हिसासाठी अमेरिकन कंपन्यांनी प्रत्येक कर्मचाऱ्यासाठी प्रतिवर्षी १ लाख डॉलर म्हणजेच ८८ लाख रुपये भरण्याची तरतूद केली आहे. या निर्णयाचा फटका आयटी क्षेत्रातील कंपन्यांना बसणार असल्याचे बोलले जाते. या व्हिसाचा फायदा भारतीय नागरिकांनी अधिक घेतल्याची आकडेवारी समोर आलेली आहे. या निर्णयानंतर आता मायक्रोसॉफ्ट, जेपी मॉरगन आणि ॲमेझॉन सारख्या कंपन्यांनी एच-१बी व्हिसाधारक कर्मचाऱ्यांसाठी महत्त्वाच्या सूचना जारी केल्या आहेत.

रॉयटर्सने दिलेल्या वृत्तानुसार, ॲमेझॉन कंपनीने सर्व एच-१बी आणि एच-४ व्हिसाधारक कर्मचाऱ्यांना ईमेल पाठवला आहे. ईमेलमध्ये सगळ्या कर्मचाऱ्यांना २१ सप्टेंबरच्या आत अमेरिकेत परतण्यास सांगितले आहे. त्यानंतर डोनाल्ड ट्रम्प प्रशासनाने लागू केलेल्या नियमाची अंमलबजावणी सुरू होणार आहे. एच-४ व्हिसाधारक हे एच-१बी व्हिसा धारकांचे कायदेशीर पती-पत्नी आणि अविवाहित मुले आहेत.

या ईमेलनंतर एका भारतीयाला त्वरित कामावर रुजू होण्यासाठी अमिरिकेत जावं लागल्याने त्याचं ठरलेलं लग्न मोडलं आहे. या घटनेने त्याने ट्रम्प प्रशासनावर नाराजी व्यक्त केली आहे. डोनाल्ड ट्रम्प यांचा हा निर्णय बेजबाबदार आणि अत्यंत दुर्दैवी आहे अशी टीका अमेरिकेतल्या सिनेट सदस्यांपैकी काहींनी केली आहे.