अमेरिका-इराण युद्धादरम्यान इराकमध्ये आणखी एक विमान दुर्घटना घडली आहे. पश्चिम इराकमध्ये गुरुवारी अमेरिकीचे हवाई दलाचं KC-135 एरियल रिफ्यूलिंग टँकर क्रॅश झालं. विमानातील ६ क्रू मेंबर्सपैकी ४ जणांचा मृत्यू झाला. यूएस सेंट्रल कमांडने शुक्रवारी दोन विमानाची धडक झाल्याच्या घटनेला दुजोरा दिला. एका विमानाचं सुरक्षितरित्या लँडिग करण्यात आलं आहे. तर दुसऱ्या विमानाच्या दोन क्रू मेंबर्सचा शोध सुरू आहे.

कुठे झाली दुर्घटना ?

विमान कोसळल्याची घटना ऑपरेशन एपिक फ्युरीदरम्यान फ्रंडली भागात घडली. विमान नेमकं कशामुळे कोसळलं, याचा तपास करण्यात येत असल्याचे सेंटकॉमने स्पष्ट केलं आहे. इराणचं पाठबळ असलेल्या इराकच्या इस्लामिक रेसिस्टेंस गटाने दावा केला आहे की, त्यांनी KC-135 विमान पाडलं आहे. परंतु अमेरिकेच्या सैन्य दलाने त्यांचा दावा फेटाळून लावला आहे.

KC-135 हे विमान १९५०-१९६० च्या दशकात बोईंगद्वारे तयार करण्यात आलंय. हे विमान अमेरिकेच्या हवाईदलाचं प्रमुख रिफ्यूलिंग प्लॅटफॉर्म मानले जाते. KC-135 हे लांब पल्ल्याच्या उड्डाणांदरम्यान लढाऊ विमानांना हवेतच इंधन भरते. युद्धाच्या सुरुवातीला अमेरिकेचे चौथे विमान हे दुर्घटनाग्रस्त झालं. मागच्या आठवड्यात कुवैतने अनावधानाने अमेरिकेचे तीन F-15E स्ट्राइक ईगल्स विमान पाडले होते. परंतु त्यातील सर्व पायलट बचावले होते.

युद्धादरम्यान अमेरिकेचे एकूण ७ सैनिक शहीद झाले आहेत. तर कुवैतमधील एका बंदरावर ड्रोन हल्ला झाला. त्यात ७ जणांचा मृत्यू झाला होता. तर सौदी अरबच्या एअरबेसवर हल्ला झाला. त्यातही एका सैनिकाचा मृत्यू झाला. पेंटागनच्या माहितीनुसार, आतापर्यंत युद्धात १४० अमेरिकी सैनिक जखमी झाले आहेत. यातील ८ जणांची प्रकृती गंभीर आहे.