मध्य-पूर्वेतील युद्धामुळे जगात इंधनकोंडी झाली आहे. भारतासह अनेक देशांमध्ये सर्वसामान्यांना त्याची झळ बसतेय. इराणच्या निकराच्या लढ्यामुळे हे युद्ध लांबलंय. मात्र इराणला गुडघे टेकायला लावण्याचे ट्रम्प आणि नेत्यनाहू यांचे मनसुबे आता फोल ठरल्याचं दिसून येतंय. युद्ध कधी थांबणार ? याकडे जगाचं लक्ष लागलेलं असतानाच अमेरीकेचे राष्ट्राध्यक्ष डोनाल्ड ट्रम्प यांनी एक मोठं विधान केलंय. इराणमधून बाहेर पडून युद्ध थांबवण्याचे संकेत त्यांनी दिलेत. .

आम्ही इराणमधून बाहेर पडणार आहोत आणि ही प्रक्रिया येत्या 2 ते 3 आठवड्यांत पूर्ण होईल, असे अमेरिकेचे राष्ट्राध्यक्ष डोनाल्ड ट्रम्प यांनी म्हटलं . ट्रम्प यांनी यापूर्वीही एकदा दोन दिवस आणि एकदा पाच दिवस युद्धबंदीची घोषणा करुन इराणला होर्मुझची सामुद्रधुनी उघडण्यासाठी मुदत दिली होती. मात्र आपला शब्द न पाळता त्यांनी इराणवर हल्ले केले होते. त्यामुळे ट्रम्प यांच्या खोटेपणावर अनेक राष्ट्रांनी टीकेची झोड उठवली आहे. आता गुरुवारी सकाळी ट्रम्प देशाला संबोधित करणार आहेत.

यात ते इराणसोबतच्या युद्धविरामाबाबत खरचं मोठा निर्णय घेणार का? हे पहावं लागणार आहे. खरतर या निर्णयामागे एक मोठं कारणही आहे. जगावर ज्यांनी युद्ध लादलं, त्यांच्याच खुर्च्या आता धोक्यात आल्यात. अमेरिकेत 'नो किंग्स' आंदोलनाचा वणवा पेटलाय. ट्रम्प आणि युद्धा विरोधात तब्बल 90 लाख नागरिक रस्त्यावर उतरलेत. आपल्याच देशात ट्रम्प एकाकी पडलेत. इस्रायलमध्येही पंतप्रधान नेत्यानाहूंविरोधातही 'नो वॉर'चे नारे घुमतायत.

दुसरीकडे इटली, फ्रान्स, स्पेन आणि स्वित्झर्लंड यांसारख्या अनेक सहयोगी आणि नाटो सदस्य देशांनी अमेरिकेला लष्करी मदत नाकारली आहे. त्यामुळे एकाकी पडलेली अमेरीका आपली तलवार म्यान करुन खरच एक पाऊल मागे येणार का? इराणच्या अटी शत्रू राष्ट्र मान्य करणार का? आखाती देशातील युद्ध थांबून जगात शांतता नांदणार का? याकडे जगाचं लक्ष लागलंय.