नवी दिल्ली : नागपुरातील दीक्षाभूमी अंडरग्राऊंड पार्किंगवरून वातावरण राजकीय वातावरण तापलं आहे. नागपुरातील दीक्षाभूमी अंडरग्राऊंड पार्किंगला आंबेडकरी अनुयायांनी विरोध दर्शवला आहे. आंबेडकरी अनुयायांच्या विरोधानंतर उपमुख्यमंत्री देवेंद्र फडणवीस यांनी या कामाला स्थगिती दिली आहे. देवेंद्र फडणवीस यांच्या निर्णयावर केंद्रीय राज्यमंत्री रामदास आठवले यांनी प्रतक्रिया दिली आहे. आंबेडकरी जनतेचा विरोध असेल तर माझाही पार्किंगला विरोध आहे, अशी प्रतिक्रिया रामदास आठवलेंनी दिली आहे. तसेच यावेळी आठवलेंनी विधानपरिषदेच्या उमेदवारीवरही भाष्य केलं.

केंद्रीय राज्यमंत्री रामदास आठवले यांनी नवी दिल्लीत माध्यमांशी संवाद साधला. यावेळी रामदास आठवले यांनी दीक्षाभूमीतील अंडरग्राऊंड पार्किंगवर भाष्य केलं. रामदास आठवले म्हणाले, 'सरकारने 200 कोटी रुपये मंजूर केले आहेत. यावर चर्चा करून पार्किंग अंडरग्राऊंड करण्याचा निर्णय घेण्यात आला होता. मात्र, देवेंद्र फडणवीस यांनी लोकांची भावना लक्षात घेऊन या कामाला स्थगिती दिली आहे'.

'दीक्षाभूमीपेक्षा पार्किंगला जास्त खर्च होत आहे, अशी लोकांची भावना आहे. लोकांच्या भावनांचा विचार करण्यात आला आहे. आंबेडकरी अनुयायींचा विरोध असेल तर माझाही पार्किंगला विरोध आहे, अशी भूमिका रामदास आठवलेंनी स्पष्ट केली.

...म्हणून आम्ही भाजपवर नाराज - रामदास आठवले

विधानपरिषद उमेदवारीवरून रामदास आठवलेंनी नाराजी व्यक्त केली आहे. आठवले म्हणाले, 'पंकजा मुंडे यांना जागा मिळाली चांगली गोष्ट आहे.पंकजा मुंडे या गोपीनाथ मुंडे यांचा वारसा चालवत आहे. रिपब्लिकन पक्षाने एक मंत्रिपद आणि एक विधानपरिषद मागणी केली होती, पण आम्हाला ती दिली नाही. भाजपने आम्हाला जागा दिली नाही, त्याबद्दल आम्ही नाराज आहोत. आम्हाला विधानसभेत ८ ते १० जागा मिळाव्यात, अशी आमची मागणी आहे'.