इस्लामाबाद : पाकिस्तानमधून सर्वात मोठी बातमी आता समोर आली आहे. पाकिस्तानमधील बलोच आर्मीने संपूर्ण ट्रेनच हायजॅक केलीय. दशतवाद्यांनी रेल्वेतील १०० जणांना ओलीस ठेवलं आहे. रेल्वेला अपहरणकर्त्यांकडून सोडवण्यासाठी गेलेल्या पाकिस्तानी लष्करातील सहा सैनिकांचा मृत्यू झाला आहे. सैन्य कारवाई केली तर प्रवाशांना ठार करण्यात येईल, असा इशारा बलोच आर्मीने दिला आहे.

प्रवाशांमध्ये पोलीस, पाकिस्तानी लष्कर, दहशतवाद विरोधी दल आणि इंटर-सर्व्हिसेस इंटेलिजन्सचे कर्मचारी आहेत. हे सर्वजण पंजाबला जात होते. ट्रेनमध्ये उपस्थित सैनिकांनी कोणतीही कारवाई करण्याचा प्रयत्न केल्यास सर्वांना मारण्यात येईल, असा इशारा बलोच आर्मीने दिला आहे.

दरम्यान, रेल्वेचं अपहरण केल्यानंतर बलोच आर्मीने महिला आणि मुलांना मुक्त केलंय. मिळालेल्या माहितीनुसार, बलोच आर्मीची फिदायन युनिट, मजीद ब्रिगेड या मोहिमेचं नेतृत्व करत आहे. ज्यामध्ये फतेह पथक, एसटीओएस आणि गुप्तचर शाखा जिराब यांचा समावेश आहे.