Summary -

• पाकिस्तानच्या पंजाब प्रांतात भीषण रस्ते अपघात झाला

• खेळाडूंना घेऊन जाणाऱ्या बसची व्हॅनला जोरदार धडक

• अपघातामध्ये १५ जणांचा जागीच मृत्यू,

• अपघातामध्ये २० हून अधिक जण जखमी

पाकिस्तानमध्ये भीषण रस्ते अपघाताची घटना घडली. खेळाडूंना घेऊन जाणाऱ्या बसने महामार्गावर व्हॅनला धडक दिली. या अपघातामध्ये १५ जणांचा जागीच मृत्यू झाला. तर २० पेक्षा अधिक जण गंभीर जखमी झाले आहे. अपघाताची माहिती मिळताच पोलिसांनी घटनास्थळी धाव घेत जखमींना तात्काळ रुग्णालयात दाखल केले. जखमींमधील अनेकांची प्रकृती गंभीर आहे. त्यामुळे मृतांचा आकडा वाढण्याची शक्यता आहे.

मिळालेल्या माहितीनुसार, पंजाब प्रांतात नवीन वर्षाच्या पहिल्याच दिवशी अपघाताची ही घटना घडली. फैसलाबाद येथील युनिव्हर्सिटी ऑफ व्हेटरनरी अँड अॅनिमल सायन्सचे विद्यार्थी बुधवारी रात्री बसमधून प्रवास करत होते. हे सर्व विद्यार्थी खेळाडू होते आणि ते एका क्रीडा स्पर्धेमध्ये सहभागी होण्यासाठी लाहोरला निघाले होते. पण वाटेतच त्यांच्या बसवर काळाने घाला घातला. लाहोरपासून २०० किमी अंतरावर अड्डा फकीर दी कुल्ली परिसरात खेळाडूंच्या बसची आणि व्हॅनची समोरासमोर जोरदार धडक झाली.

हा अपघात इतका भीषण होता की यामध्ये बस आणि व्हॅनचा चक्काचूर झाला. या अपघातामध्ये १५ जणांनी जागीच प्राण सोडले. मृतांमध्ये अनेक खेळाडूंचा समावेश आहे. स्थानिकांनी घटनास्थळी धाव घेत अपघाताची माहिती पोलिसांना दिली. पोलिसांनी घटनास्थळी धाव घेत सर्व जखमींना उपचारासाठी रुग्णालयात दाखल केले. जखमींमधील अनेकांची प्रकृती चिंताजनक आहे. त्यामुळे मृतांचा आकडा वाढण्याची भीती व्यक्त केली जात आहे. या घटनेमुळे पाकिस्तानमध्ये हळहळ व्यक्त केली जात आहे. हा अपघात नेमका कसा झाला याचा तपास पोलिस करत आहेत.