बिहारची राजधानी असलेल्या पटनामधून धक्कादायक वृत्त हाती आलं आहे. एकाच कुटुंबातील तिघांचा एका पाठोपाठ मृत्यू झाल्याची घटना घडली आहे. मृतांमध्ये दोन भाऊ आणि वडिलांचा समावेश आहे. तिघांच्या मृत्यूने परिसरात खळबळ उडाली आहे. तिघांच्या मृत्यू प्रकरणी पोलिसांनी पुढील तपास सुरु केला आहे.

मिळलेल्या माहितीनुसार, पटनाच्या पालीगंज अनुमंडलच्या सीगोरी पोलीस स्टेशनच्या हद्दीतील करहरा गावात तिघांच्या मृत्यूची दुर्दैवी घटना घडली. कुटुंबातील तिघांची तब्येत अचानक बिघडली. त्यामुळे तिघांनी परिसरातील डॉक्टरांकडून उपचार घेण्यास सुरुवात केली. याचदरम्यान कुटुंबातील एका मुलाचा मृत्यू झाला.

नेमकं काय घडलं?

मृतकाच्या नातेवाईकांनी सांगितलं की, तिघे पालीगंज येथील चंदौस येथील जत्रेत गेले होते. जत्रेत सर्वत्र फिरल्यानंतर तिघांनी एका ठिकाणी पाणीपुरी खाल्ली. घरी आल्यानंतर पाणीपुरी खालेल्या तिघांनी घरी येऊन जेवण केलं. रात्री अचानक तिघांच्या पोटात दु:खू लागलं. यामुळे तिघांची तब्येत बिघडली. तिघांपैकी एकाचा घरातच मृत्यू झाला.

नातेवाईकांनी नीरज आणि निर्भय कुमार या दोघांना पालीगंज अनुमंडल रुग्णालयात दाखल केलं. मात्र, पुढील उपचारासाठी दोघांना पीएमसीएच रुग्णालयात हलवण्यात आलं. दुसऱ्या दिवशी सकाळी या दोघांचा मृत्यू झाला.

नीरज साव असे मृत्यू झालेल्या व्यक्तीचे नाव आहे. तर निर्मल कुमार (वय ८) आणि निर्भय कुमार (४) असे मृत्यू झालेल्या दोन्ही भावांचं नाव आहे. तिघांच्या मृत्यूने गावावर शोककळा पसरली आहे. या घटनेबाबत अद्याप सविस्तर माहिती समोर आलेली नाही. घटनेची माहिती मिळताच स्थानिक पोलीस आणि एफएसएलच्या टीमने तपासाला सुरुवात केली आहे.