तमिळनाडू विधानसभा निवडणुकीत दोन जागांवर विजय मिळवणारे मुख्यमंत्री थलपती विजय यांनी तिरूचिरापल्ली पूर्व मतदारसंघाचा राजीनामा दिला असून, त्यांनी पेरबर ही जागा आपल्याकडे कायम ठेवली आहे. TVK प्रमुख विजय यांनी आज सकाळी मुख्यमंत्रिपदाची शपथ घेतली. 23 एप्रिल रोजी झालेल्या विधानसभा निवडणुकीत विजय यांनी दोन मतदारसंघातून निवडणूक लढवली होती आणि दोन्हीकडे दणदणीत विजय मिळवला होता. नियमानुसार एका जागेचा राजीनामा देणे आवश्यक असल्याने त्यांनी तिरूचिरापल्ली पूर्व जागा सोडण्याचा निर्णय घेतला. या निवडणुकीत विजय यांच्या दोन जागांसाह TVK पक्षाला एकूण 108 जागा मिळाल्या होत्या, मात्र आता एक जागा सोडल्यामुळे पक्षाचे संख्याबळ 107 झाले आहे.

मुख्यमंत्रीपदाची सूत्रे स्वीकारण्यापूर्वी विजय यांनी आपला राजीनामा सादर केला. त्यांनी आपले राजीनामा पत्र मंत्री के.ए. सेंगोट्टैयन आणि पी. व्यंकटरमण यांच्यामार्फत विधानसभेचे प्रधान सचिव के. श्रीनिवासन यांच्याकडे सुपूर्द केले. रविवारी एका भव्य समारंभात विजय यांनी मुख्यमंत्रिपदाची शपथ घेतली. यावेळी काँग्रेसचे नेते राहुल गांधी उपस्थित होते. तामिळनाडूमध्ये गेल्या ६० वर्षांत पहिल्यांदाच द्रमुक (DMK) आणि अद्रमुक (AIADMK) व्यतिरिक्त तिसऱ्या पक्षाचे सरकार स्थापन झाले आहे.

शपथविधी सोहळ्याला संबोधित करताना थलपती विजय म्हणाले, मी कोणत्याही राजघराण्यातून आलेलो नाही. मी तुमच्यासारखाच आहे, तुमच्या कुटुंबातील एक सदस्य आहे. एका सामान्य चित्रपट दिग्दर्शकाचा मुलगा म्हणून माझा जन्म झाला, त्यामुळे मी गरिबी जवळून अनुभवली आहे.