पश्चिम बंगालमध्ये विधानसभा निवडणुकीमुळे घडामोडींना वेग आला आहे. सर्व राजकीय पक्षांनी निवडणुकीची तयारी सुरू केली आहे. या निवडणुकीआधी भाजपला मोठा फायदा होऊ शकतो. कारण प्रसिद्ध टेनिस खेळाडू लिएंडर पेस हा भाजपमध्ये प्रवेश करण्याची शक्यता आहे. पेसने मंगळवारी भाजपचे राष्ट्रीय अध्यक्ष नितीन नबीन यांची कोलकातामध्ये भेट घेतली. भाजपमध्ये प्रवेश केल्यानंतर पेस हा पक्षाच्या उमेदवारांचा प्रचार करताना दिसू शकतो.

पश्चिम बंगालची विधानसभा निवडणूक दोन टप्प्यात होणार आहे. पहिला टप्प्याचं मतदान २३ एप्रिल रोजी होणार आहे. तर दुसऱ्या टप्प्याचं मतदान २९ एप्रिल रोजी होणार आहे. निवडणूक आयोगाने निवडणुकीची तयारी देखील केली आहे. आयोगानेही मतदारांची पहिली यादी देखील जाहीर केली आहे.

पेसचा २०२१ साली टीएमसीत प्रवेश

पश्चिम बंगालच्या विधानसभा निवडणुकीदरम्यान लिएंडर पेस भाजप प्रवेशाच्या चर्चा सुरू आहेत. लिएंडर पेसने भाजपमध्ये प्रवेश केला, तर त्याचा उपयोग पक्षाकडून केला जाऊ शकतो. पेसचा चेहरा वापरून युवा मतदारांना वळवण्याचे काम भाजपकडून केले जाऊ शकते. लिएंडर पेसने ऑक्टोबर २०२१ साली गोव्यात मुख्यमंत्री ममता बॅनर्जी यांच्या पक्षात प्रवेश केला. परंतु त्याला गोव्यात त्याचा राज्य स्तरीत कमिटीत समावेश करण्यात आलेला नाही.

अर्घ्य राय प्रधान यांची भाजपमध्ये एन्ट्री

तत्पूर्वी, काही दिवसांपूर्वी टीएमसी नेते अर्घ्य राय प्रधान यांनीही भाजपमध्ये प्रवेश केला. अर्घ्य राय प्रधान कूचबिहारच्या विकासासाठी लढलेले व्यक्तिमत्व मानले जाते. त्यांनी २०१६ सालापासून ते यंदा झालेल्या लोकसभा निवडणुकीपर्यंत मतदारसंघासाठी मोठ्या प्रमाणावर काम केलंय. अर्घ्य रॉय प्रधान हे अनेक वर्षांपासून टीएमसीचे सदस्य होते. त्यांचे वडील अमर रॉय प्रधान हे देखील बंगालच्या राजकारणात सक्रिय नेते होते.