High speed train crash Spain : स्पेनमध्ये २ हाय-स्पीड ट्रेनची जोरदार धडक झाल्याची धक्कादायक घटना झाली. या अपघातामध्ये २१ जणांचा मृत्यू झाला आहे. तर ३० पेक्षा जास्त प्रवासी गंभीर जखमी आहेत. रविवारी दक्षिण स्पेनमध्ये झालेल्या भीषण रेल्वे अपघाताने देश हादरला. कॉर्डोबा शहराजवळील अदमुझ परिसरात २ हाय-स्पीड ट्रेनची धडक झाली. मालागाहून माद्रिदला जाणारी हायस्पीड ट्रेन रुळावरून घसरून दुसऱ्या मार्गावर आदलळी. त्याचवेळी माद्रिदहून हुएल्वाला जाणारी दुसरी ट्रेनने या ट्रेनला जोरात धडक दिली.

या अपघातामध्ये आतापर्यंत २१ जणांचा मृत्यू झाल्याची अधिकृत आकडेवारी समोर आली आहे. या अपघातामध्ये ७० हून अधिक प्रवासी गंभीर जखमी झाले आहेत. त्यामध्ये ३० जणांची प्रकृती चिंताजनक असल्याचे सांगण्यात येत आहे. अद्याप बचावकार्य सुरू असल्याने मृताची संख्या आणखी वाढण्याची भीती वर्तवण्यात येत आहे. स्पेनचे वाहतूक मंत्री ऑस्कर पुएंटे यांनी या वृत्ताला दुजोरा दिला आहे. अपघातामधील ३० जखमींची प्रकृती गंभीर असून त्यांना रुग्णालयात दाखल करण्यात आल्याचे त्यांनी सांगितले आहे.

स्थानिक मिडिया रिपोर्ट्सनुसार, मालगा येथून ट्रेन निघाल्यानंतर फक्त १० मिनिटांतच हा अपघात झाला. धक्कादायक म्हणजे ट्रेन ज्या रुळावरून घसरली त्याचे मे २०२५ मध्ये नूतनीकरण करण्यात आले होते. स्पेनच्या वाहतूक मंत्र्यांनी या घटनेबाबत दुख व्यक्त केले आहे. जखमींना तात्काळ मदत करण्यात येत असल्याचेही त्यांनी सांगितले. हा अपघात नेमका कसा झाला, याचं कारण काय? याबाबत अद्याप कोणतीही अधिकृत माहिती समोर आलेली नाही.

खासगी आणि सरकारी ट्रेन धडकल्या

आयरियो कंपनीमार्फत चालवली जात असलेल्या अपघातग्रस्त मालागा ते माद्रिद या ट्रेनमध्ये जवळपास ३०० प्रवासी होते. तर सरकारी कंपनी रेन्फेकडून चालवली जात असलेल्या दुसऱ्या ट्रेनमध्ये १०० प्रवासी होते, अशी माहिती समोर आली आहे. अपघातानंतर रेल्वेचे डब्बे रूळावरून खाली घसरले. दोन्ही हायस्पीड ट्रेनच्या भयंकर धडकेने देश हादरलाय. दरम्यान, या अपघातानंतर माद्रिद आणि अंडालुसिया दरम्यानच्या रेल्वे सेवा स्थगित करण्यात आल्या आहेत. त्याशिवाय अपघातग्रस्त प्रवाशांच्या कुटुंबांसाठी आपत्कालीन मदत आणि समुपदेशन सेवा सुरू केल्या आहेत.