हरियाणातील सिरसा येथे एका मुलाने त्याच्या आईची हत्या केल्याची खळबळजनक घटना समोर आली आहे. धक्कादायक म्हणजे मृत महिलेचे अनैतिक संबंध तिच्या मुलाला मान्य नसल्याने तरुणाने आईची आणि तिच्या प्रियकराची निर्घृण हत्या केली. या हत्येनंतर तरुणाने दोन्ही मृतदेह पोलीस ठाण्यात नेऊन पोलिसांच्या ताब्यात दिले असल्याची घटना घडली. पोलिसांनी या तरुणाला ताब्यात घेतले आहे.

मिळालेल्या माहितीनुसार, सिकंदरपूर जिल्ह्यात, राजकुमार नावाच्या एका तरुणाने गुरुवारी रात्री त्याच्या आईला आणि तिच्या प्रियकराला रंगेहाथ पकडले. आई आणि तिच्या प्रियकराला बघून तरुणाचा राग अनावर झाला. त्याने घरात घुसून त्यांचा गळा दाबून हत्या केली. हत्येनंतर त्याने दोघांचे मृतदेह त्याच्या गाडीमध्ये भरून थेट पोलिस ठाण्यात गेला.

पोलिस ठाण्यात जाताना पोलिसांनी त्याला अडवलं. तेव्हा त्याने त्यांना सांगितले की, त्याच्या आईचे आणि तिच्या प्रियकराचे मृतदेह गाडीत आहेत. "दोन्ही मृतदेह गाडीतून बाहेर काढा."पोलिसांनी गाडीची झडती घेतली तेव्हा त्यांना आत दोन मृतदेह आढळले. यामुळे पोलिस ठाण्यात गोंधळ उडाला. पोलिसांनी दोन्ही मृतदेह ताब्यात घेतले आणि शवविच्छेदनासाठी रुग्णालयात पाठवले आणि त्या तरुणाला ताब्यात घेतले.

पोलिस चौकशीदरम्यान, तरुण म्हणाला, "माझ्या आईचे त्या माणसावर प्रेम होते. मला अनेक दिवसांपासून हा संशय होता. मी माझ्या आईला यापूर्वी अनेक वेळा समजावून सांगितले होते, पण ती ऐकत नव्हती. गुरुवारी रात्री मी त्यांना रंगेहाथ पकडले आणि नंतर दोघांचीही हत्या केली." या दुहेरी हत्येमुळे सिकंदरपूरमध्ये खळबळ उडाली आहे. डीएसपी राजेश कुमार म्हणाले की, या प्रकरणाची चौकशी सुरू आहे.