Shraddha Walker Case : श्रद्धा वालकर हत्या प्रकरणाच्या विरोधात हिंदू एकता मंचानं मंगळवारी महापंचायतीचं आयोजन केलं होतं. मात्र, या महापंचायतीत व्यासपीठावरच मारहाणीचा प्रकार घडला. एका महिलेनं व्यासपीठावर उपस्थित एका व्यक्तीला चपलेनं मारहाण केली. व्यासपीठावर उपस्थित अन्य पदाधिकाऱ्यांनी मध्यस्थी केल्यानं प्रकरण निवळलं.

दिल्लीच्या छतरपूर परिसरात श्रद्धा वालकरला न्याय देण्याच्या मागणीसाठी हिंदू एकता मंचाने महापंचायतीचं आयोजन केलं होतं. आफताबनं ज्या परिसरात श्रद्धाची हत्या केली, त्याच परिसरात ही महापंचायत भरवली होती. बेटी बचाओ फाउंडेशननंही या महापंचायतीला समर्थन दिलं होतं. (Latest Marathi News)

महापंचायत सुरू असताना एक महिला आपली तक्रार घेऊन व्यासपीठावर आली. त्याचवेळी व्यासपीठावरील एका व्यक्तीनं तिला माईकपासून दूर करण्यासाठी धक्का मारला. त्यावर संताप अनावर झालेल्या महिलेनं त्या व्यक्तीला चपलेनं मारलं. त्याचवेळी तिथं उपस्थित अन्य लोकांनी मध्यस्थी केली. मारहाण करणाऱ्या महिलेला थांबवलं. (Crime News)

आफताबवर श्रद्धाच्या हत्येचा आरोप

आफताबनं १८ मे रोजी श्रद्धा वालकरची गळा आवळून हत्या केली होती, असा आरोप आहे. दोघांनी ८ मे रोजी दिल्लीच्या महरौली येथे फ्लॅट घेतला होता. तिथे ते दोघे लिव्ह इन रिलेशनशिपमध्ये राहत होते. त्याआधी हे दोघेही मुंबईत राहायचे. १८ मे रोजी श्रद्धा आणि आफताबमध्ये भांडण झाले. त्यानंतर आफताबनं तिची हत्या केली.

आफताबनं तिच्या मृतदेहाचे तुकडे केले आणि फ्रीजमध्ये ठेवले होते. महरौली जंगलात रोज रात्री तो ते तुकडे फेकायचा. पोलिसांनी आफताबला १२ नोव्हेंबरला अटक केली होती. आफताब सध्या पोलीस कोठडीत असून, त्याची १ डिसेंबरला नार्को टेस्ट होणार असल्याचे सांगण्यात येत आहे.