Summary -

• सिडनीच्या बोंडी बीचवर अंदाधुंद गोळीबार

• गोळीबारात १० जणांचा मृत्यू तर अनेक जण जखमी आहे

• हनुक्का उत्सवादरम्यान गोळीबार झाला

• न्यू साउथ वेल्स पोलिसांनी परिसर सील करून तपास सुरू केला

• घटनेचा थरारक व्हिडीओ सोशल मीडियावर व्हायरल

ऑस्ट्रेलियातील सिडनीमधून एक धक्कादायक घटना समोर आली आहे. याठिकाणच्या प्रसिद्ध बोंडी बीचवर अंदाधुंद गोळीबार करण्यात आला. रविवारी सकाळी ही मोठी घटना घडली असून यामध्ये १० जणांचा मृत्यू झाला तर अनेक जण गंभीर जखमी झाले आहेत. जखमींना रुग्णालयात दाखल करण्यात आले आहे. बोडी बीचवर हनुक्का उत्सव सुरू असताना हा गोळीबाराचा थरार झाला. घटनेची माहिती मिळताच पोलिसांनी घटनास्थळी धाव घेत संपूर्ण परिसर सील केला. या घटनेचा थरकाप उडवणारा व्हिडीओ समोर आला आहे

न्यू साउथ वेल्स पोलिसांनी सांगितले की, परिस्थिती पूर्णपणे नियंत्रणात येईपर्यंत पोलिसांनी नागरिकांना बीचच्या परिसरात जाणं टाळण्याचे आणि घरात राहण्याचे आवाहन केले आहे. न्यू साउथ वेल्स पोलिसांनी सोशल मीडिया प्लॅटफॉर्म एक्सवर एक अलर्ट जारी केला आहे. यामध्ये त्यांनी असे म्हटले आहे की, 'पोलिस सध्या या प्रकरणाचा तपास करत आहेत. कृपया त्या परिसरापासून दूर रहा आणि आपत्कालीन सेवांच्या सूचनांचे पालन करा.'

स्थानिक माध्यमांनी दिलेल्या वृत्तानुसार, घटनेदरम्यान सुमारे ५० गोळीबाराचे आवाज ऐकू आले ज्यामुळे परिसरात घबराट पसरली. बीचवर मोठ्या संख्येने नागरिक उपस्थित होते. गोळीबाराचा आवाज ऐकून सर्वजण सैरावैरा पळू लागले. आपला जीव वाचवण्यासाठी त्यांची धावपळ सुरू होती. बीचजवळ आयोजित हनुक्का या ज्यू सणाच्या पार्टीदरम्यान हा गोळीबार झाला.

या गोळीबाराच्या घटनेनंतर पोलिसांनी दोन जणांना ताब्यात घेतले आहे. तर पोलिस पुढील तपास करत आहेत. पोलिसांनी संपूर्ण परिसराला घेराव घालत आहे आणि तपास करत आहेत आणि कडक सुरक्षा व्यवस्था ठेवण्यात आली आहे. गोळीबाराची घटना घडली तेव्हा १००० हून अधिक जण तिथे उपस्थित होते. या गोळीबाराचा व्हिडीओ समोर आला आहे. यामध्ये गोळीबाराचा आवाज येताना आणि सर्व नागरिक जीव वाचवण्यासाठी पळताचा दिसत आहेत. या गोळीबाराच्या घटनेनंतर सायरन वाजवण्यात आला.