झाशीमधून एक धक्कादायक बातमी समोर येत आहे. सराफा व्यावसायिकाच्या मुलानं दारूच्या नशेत एका तरूणीची छेड काढली आहे. बार कामगार महिलेशी गैरवर्तन केले आहे. तरूणानं तिला घट्ट मिठीत घेऊन तिचे चुंबन घेतले आहे. ही संपूर्ण घटना बारमधील सीसीटीव्ही कॅमेऱ्यात कैद झाली आहे. या घटनेचा सीसीटीव्ही सोशल मीडियात व्हायरल झाला आहे. या घटनेनंतर सराफा व्यावसायिकाच्या मुलावर नेटकऱ्यांनी कमेंटद्वारे रोष व्यक्त केला आहे. या प्रकरणी तक्रारीनुसार, पोलिसांनी त्याला ताब्यात घेतलं आहे.

मिळालेल्या माहितीनुसार, ही घटना अलाहाबाद बँक स्क्वेअर येथील एका बार रेस्टॉरंटमध्ये घडली आहे. अमन अग्रवाल असे आरोपीचे नाव आहे. तो एका सराफा व्यावसायिकाचा मुलगा आहे. पीडित तरूणी अलाहाबाद बँक स्क्वेअर येथील बार रेस्टॉरंटमध्ये काम करते. घटनेच्या दिवशी आरोपी बार रेस्टॉरंटमध्ये गेला होता. अमन अग्रवाल भरपूर दारू प्यायला होता.

व्हायरल व्हिडिओमध्ये तरूणी रिसेप्शनजवळ उभी असल्याचं दिसत आहे. तिथे २ अन्य तरूणी आणि अमन अग्रवालही दिसत आहे. अमन पीडित तरूणीसोबत चर्चा करत असताना दिसत आहे. आधी अमन तिच्या हाताला चुंबन घेऊन पुढे जातो. नंतर पुन्हा माघारी येतो. तसेच तिला मिठीत घेऊन चुंबन घेतो.

यानंतर अमन अग्रवाल इतर २ तरूणींसोबत पुढे जातो. ही संपूर्ण घटना सीसीटीव्ही कॅमेऱ्यात कैद झाली आहे. मिळालेल्या प्राथमिक माहितीनुसार, ही घटना नबाबाद पोलीस स्टेशन परिसरातील असल्याची माहिती आहे. सीसीटीव्ही समोर येताच पोलिसांनी कारवाईला सुरूवात केली. तसेच आरोपी अमन अग्रवालला पोलिसांनी बेड्या ठोकल्या आहेत. त्याच्याविरोधात गुन्हा नोंदवण्यात आला असून, पुढील तपास पोलिसांकडून सुरू आहे.