कानपूरच्या बिधानू पोलीस स्टेशन परिसरातील जगदीशपूर गावातून संतापजनक घटना उघडकीस आली आहे. २१ वर्षीय विवाहित महिलेच्या मृत्यूनंतर परिसरात खळबळ उडाली आहे. कुटुंबाने आरोप केला की, विवाहित महिला आपल्या प्रियकरासोबत त्य़ाच्या घरातच राहत होती. आरोपी प्रियकराने आधी विवाहित महिलेवर बलात्कार केला. नंतर तिच्या गुप्तांगात कापडाचे तुकडे भरले. या वेदनेला कंटाळून महिलेनं आयुष्य संपवलं. मृत महिलेच्या वडिलांनी आरोपी प्रियकराविरोधात तक्रार दाखल केली आहे.

मिळालेल्या माहितीनुसार, मानसी (वय वर्ष २१) असे मृत विवाहित महिलेचं नाव आहे. तीन वर्षांपूर्वी मानसीचे लग्न झाले होते. कुटुंबातील सदस्यांच्या म्हणण्यानुसार, सुमारे नऊ महिन्यांपूर्वी मानसीची बिधानू पोलीस स्टेशन परिसरातील जगदीशपूर गावातील रहिवासी मनीष यादवशी सोशल मीडियावरून ओळख झाली होती. नंतर मैत्रीचं रूपांतर प्रेमात झालं. सहा महिन्यांपूर्वी मानसी वडिलांच्या घरात एका कार्यक्रमानिमित्त गेली होती.

यादरम्यान, संधी साधून मानसी मनीषसोबत पळून गेली. याची माहिती मिळताच मानसीच्या वडिलांनी पोलीस ठाण्यात धाव घेतली. तसेच मुलगी बेपत्ता झाली असल्याची तक्रार दाखल केली. दहा दिवसानंतर मानसी पोलीस स्टेशनमध्ये गेली. तसेच मर्जीने मनीषसोबत गेली असल्याचं सांगितलं. पोलिसांनी याबाबत कुटुंबाला माहिती दिली.

गेल्या सहा महिन्यांपासून तिचे मनीषसोबत अनैतिक संबंध होते. ती त्याच्या घरात होती. घटनेच्या दिवशी पोलिसांना मानसी रूग्णालयात असून, तिची प्रकृती गंभीर असल्याची माहिती मिळाली. पोलिसांनी मानसीच्या कुटुंबाला या घटनेबाबत माहिती दिली. कुटुंबाने रूग्णालयात धाव घेतली. मात्र, तिचा मृत्यू झाला होता. या घटनेनंतर कुटुंबाने पोलिसांकडे मनीषविरोधात तक्रार दाखल केली.

मानसीची आई म्हणाली, 'मनीषने माझ्या मुलीला मारले आहे. मनीषने आधी मानसीवर बलात्कार केला. नंतर तिच्या गुप्तांगात कपडे भरले. याच छळाला तिनं विष पिऊन आत्महत्या केली', असा आरोप केला. दरम्यान, आरोपी फरार असून, सध्या पोलिसांकडून आरोपीचा शोध घेतला जात आहे. या घटनेनंतर परिसरात खळबळ उडाली आहे.