कर्नाटकातील बंगळूरूमधून एक धक्कादायक बातमी समोर येत आहे. एका खासगी स्कॅनिंग सेंटरमध्ये संतापजनक प्रकार घडला आहे. वैद्यकीय स्कॅनदरम्यान रेडिओलॉजिस्टने महिलेसोबत अश्लील वर्तन केले. याचा व्हिडिओही समोर आला आहे. महिलेनं रेडिओलॉजिस्टवर अश्लील स्पर्श केल्याचा आरोप केला आहे. महिला आपल्या पतीसोबत स्कॅनिंग सेंटरमध्ये गेली होती. यादरम्यान हा प्रकार घडला. या प्रकरणी महिलेनं पोलीस ठाण्यात धाव घेतली. तसेच तक्रार दाखल केली.

रिपोर्टनुसार, पीडितेनं तिच्या तक्रारीत म्हटलं की, स्कॅनदरम्यान, आरोपी जयकुमारने तिला अयोग्यरित्या स्पर्श केले. तसेच अश्लील वर्तन केले. तिनं याबाबत विरोध केला. तेव्हा आरोपी जयकुमारने तिला धमकावले. तसेच तिला गप्प करण्यासाठी अपशब्द वापरला.

मिळालेल्या माहितीनुसार, महिला तिच्या पतीसोबत पोटाची स्कॅनिंग करण्यासाठी स्कॅनिंग सेंटरवर गेली होती. पोलिसांनी सांगितले की, तिनं हा प्रकार कॅमेऱ्यात कैद केला. तसेच पोलिसांना हा व्हिडिओ दाखवून आरोपी जयकुमारविरोधात तक्रार दाखल केली. या प्रकरणी पोलिसांनी आरोपीविरोधात एफआयआर दाखल केली आहे. मात्र, जयकुमारला पोलिसांनी अटक केली नाही.

सुत्रांनी दिलेल्या माहितीनुसार, आरोपीला चौकशीसाठी पोलीस ठाण्यात बोलवण्यात आले होते. मात्र, त्याची विचारपूस करून त्याला सोडून दिलं. पीडितेवर सध्या बंगळूरूमधील राजीव गांधी रूग्णालयात उपचार सुरू आहेत. या घटनेचा व्हिडिओ सोशल मीडियात व्हायरल होत असून, पोलिसांकडून पुढील तपास सुरू आहे.