बिहारमध्ये पटनाच्या दानापूरमध्ये ६ जणांना उडवल्याची घटना घडली आहे. या भीषण अपघातात एकाचा जागीच मृत्यू झाला आहे. अपघातानंतर कारचालकाने घटनास्थळावरून पळ काढला. दानापूर पोलीस स्टेशनच्या हद्दीतील झखडी महादेव रोडवर ही घटना घडली आहे. या अपघाताच्या घटनेने परिसरात एकच खळबळ उडाली.

बिहारच्या दानापूरच्या पोलीस स्टेशनच्या हद्दीत झालेल्या अपघतात ६ जणांना उडवल्यानंतर कारचालक घटनास्थळावरून फरार झाला. अपघातानंतर चालकाने कारचा वेगाने पळ काढला. या अपघातात वृद्धाचा चाकाखाली येऊन मृत्यू झाला. तर कार चालकाने एका श्वानाला देखील चिरडलं. या अपघाताचा व्हिडिओ सोशल मीडियावर व्हायरल होत आहे.

व्हिडिओमध्ये काय दिसत आहे?

मृत व्यक्ती ६० वर्षांचा असल्याची माहिती मिळाली आहे. कार चालक दारूच्या नशेत होता का, याविषयी माहिती मिळालेली नाही. सुरुवातीला या कार चालकाने श्वानाला चिरडलं. त्यानंतर त्याने रस्त्यावरील लोकांना उडवलं.

रस्त्यावर अपघातानंतर एकच खळबळ उडाल्याचं दिसत आहे. अपघातात जखमी झालेले लोकांनी तातडीने कारचालकाला घेरण्याचा प्रयत्न केला. परंतु चालक कारचा वेग वाढवून फरार झाला. चालकाने ५०-६० च्या वेगाने कार चालवली.

अपघाताची माहिती मिळताच पोलीस आणि ट्रॅफिक पोलिसांनी या प्रकरणी चौकशी सुरु केली आहे. पोलिसांकडून अपघातानंतर सीसीटीव्ही फुटेज तपासण्याचे काम सुरू करण्यात आले आहे. अपघातानंतर कारचालकाने मरीन ड्राइव्हच्या दिशेने पळ काढला. ट्रॅफिक पोलिसांनी आधार कार्डावरून चालकाचा शोध घेण्याचं काम सुरू आहे. मात्र, अद्याप पोलिसांना चालकाचा शोध लागलेला नाही.

पोलिसांनी दिलेल्या माहितीनुसार, 'दानापूरच्या गोला रोड टी पॉइंटजवळ एका कारने काही लोकांना उडवलं. यात अनेक जण जखमी झाले. तर एकाचा उपचारादरम्यान मृत्यू झाला. अपघाताची माहिती मिळताच पोलिसांनी घटनास्थळी जाऊन सीसीटीव्ही फुटेज तपासले. तर अपघातात मृत्यूमुखी पडलेल्या व्यक्तीचा मृतदेह शवविच्छेदनासाठी पाठवण्यात आला आहे'.

खालील व्हिडिओतील दृश्य तुम्हाला विचलित करू शकतात.