उत्तर प्रदेशातून एक धक्कादायक घटना समोर आली आहे. एका पिझ्झा शॉपमध्ये बसलेल्या प्रेमी युगुलाने दुसऱ्या मजल्यावरून उडी मारल्याची घटना घडली. धक्कादायक म्हणजे या दोघांना काही लोकांनी जात विचारल्याने घाबरून त्यांनी हा निर्णय घेतल्याचं म्हटलं जात आहे. दरम्यान या घटनेत दोघेही गंभीर जखमी झाले आहेत. त्यांच्यावर जवळच्या रुग्णालयात उपचार सुरु आहेत.

मिळालेल्या माहितीनुसार, उत्तर प्रदेशातील शाहजहांपूर जिल्ह्यात बरेली मोरजवळील एका इमारतीच्या दुसऱ्या मजल्यावर एक पिझ्झा शॉप आहे. या शॉपमध्ये शनिवारी संध्याकाळी एक तरुण आणि त्याच्यासोबत त्याची प्रेयसी देखील आली होती. त्यांनी नूडल्स ऑर्डर केले होते आणि ते येतील याची ते वाट पाहत बसले होते. या दरम्यान काहीजण तिथे आले आणि त्यांनी त्यांची चौकशी सुरू केली.

त्यांनी तरुण तरुणीला त्यांची जात विचारली. यानंतर ते दोघेही घाबरले. घाबरून त्या दोघांनी त्यांनी हिंदू असल्याची कबुली दिली. मात्र गुंडगिरी करणाऱ्या काही तरुणांनी मोबाईल काढून चित्रीकरण करण्यास सुरुवात केली. आपली बदनामी होऊ शकते या कारणाने तरुणाने घाबरत दुसऱ्या मजल्यावर बाजूला असलेली खिडकी उघडली आणि खाली उडी मारली. पेचात सापडलेल्या तरुणीने देखील बॉयफ्रेंडच्या मागोमाग घाबरत खिडकीतून उडी मारली. या दुर्घटनेत दोघांनाही गंभीर दुखापत झाली.

जखमी झालेल्या दोघांनाही रुग्णालयात दाखल करण्यात आले असून तिथे त्यांच्यावर उपचार सुरू आहेत. पोलिस अधीक्षक राजेश द्विवेदी यांनी सांगितले की, घटनेची माहिती मिळताच पोलिस घटनास्थळी पोहोचले. सध्या या प्रकरणी कोणतीही लेखी तक्रार आलेली नाही. लेखी तक्रार येताच आरोपींवर कठोर कारवाई केली जाईल असे पोलिसांचे म्हणणे आहे.