नायजेरियामध्ये वाढत्या हिंसाचाराच्या घटनांमध्ये आणखी एका भीषण हल्ल्याची भर पडली आहे. नायजेरियातील झामफारा राज्यात हल्लेखोरांनी शेतात काम करणाऱ्या शेतकऱ्यांवर गोळीबार करत १७ जणांची निर्घृण हत्या केली, तर १३ जण गंभीर जखमी झाले आहेत. या घटनेमुळे परिसरात भीतीचे वातावरण निर्माण झाले असून सुरक्षा व्यवस्थेवरही प्रश्नचिन्ह उपस्थित केले जात आहे.

मिळालेल्या माहितीनुसार, ही घटना शुक्रवारी झामफारा राज्यातील मराडून भागातील गोरॉन नामाये गावात घडली. शेतकरी नेहमीप्रमाणे आपल्या शेतात काम करत असताना अचानक बाईकवरून आलेल्या हल्लेखोरांनी त्यांच्यावर हल्ला चढवला.या भीषण हल्ल्यात शेतात काम करणाऱ्या १७ जणांचा दुर्दैवी मृत्यू झाला, तर १३ जण गंभीर जखमी झाले.

मराडून स्थानिक प्रशासनाचे अध्यक्ष सुनासी दोसारा यांनी या घटनेबाबत तीव्र नाराजी व्यक्त केली आहे. तसेच सुरक्षा यंत्रणांना मराडून जंगलातील बायान-रुवा परिसरातील अतिरेक्यांच्या तळांवर कारवाई करण्याचे निर्देश देण्यात आल्याचे त्यांनी सांगितले. नायजेरियामध्ये गेल्या काही वर्षांपासून सशस्त्र टोळ्या, बंडखोर गट आणि खंडणीसाठी अपहरण करणाऱ्या गुन्हेगारांच्या कारवायांमध्ये मोठी वाढ झाली आहे.

या महिन्याच्या सुरुवातीलाही सोकोटो राज्यात दोन दिवसांत झालेल्या हल्ल्यांमध्ये किमान ३७ जणांचा मृत्यू झाला होता. सततच्या हिंसाचारामुळे हजारो लोकांचा जीव गेला असून लाखो नागरिकांना आपली घरे सोडून स्थलांतर करावे लागले आहे. सरकार आणि सुरक्षा यंत्रणांसमोर या वाढत्या दहशतीवर नियंत्रण मिळवण्याचे मोठे आव्हान उभे राहिले आहे.