Delhi Police:

संसदेतील सुरक्षा भंग केल्याप्रकरणी ६ आरोपींना अटक करण्यात आली आहे. या सर्वांना बुधवारी न्यायालयात हजर करण्यात आले. आपली बाजू मांडत असताना यातील ५ आरोपींनी पोलिसांवर गंभीर आरोप केले आहेत. दिल्ली पोलीस आमचा छळ करत आहेत. विरोधी पक्षातील नेत्यांशी आमचे संबंध नसतानाही आमचे त्यांच्याशी संबंध आहेत असे आमच्याकडून कबूल करण्यास भाग पाडले जात आहे, असे आरोप या ५ आरोपींनी पोलीसांवर केलेत.

काल झालेल्या सुनावणीवेळी मनोरंजन डी, सागर शर्मा, ललित झा, अमोल शिंदे आणि महेश कुमावत यांनी अतिरिक्त सत्र न्यायाधीश हरदीप कौर यांच्यासमोर युक्तिवादावेळी आपलं म्हणणं मांडलं. यावर न्यायमूर्तींनी या सहाही आरोपींची न्यायालयीन कोठडी आणखी १ मार्चपर्यंत वाढवली आहे.

आरोपींना विजेचा शॉक

पाचही आरोपींनी कोर्टात पुढे सांगितले की, आमच्याकडून जळपास ७० कोऱ्या कागदांवर सह्या घेतल्या आहेत. यासाठी आमचा मोठ्याप्रमाणावर छळ करण्यात आला. आम्हाला विजेचा शॉकही देण्यात आला. 'बेकायदेशीर क्रियाकलाप प्रतिबंध कायदा' (UAPA) अंतर्गत गुन्ह्यांची कबुली देण्यासाठी आणि विरोधी राष्ट्रीय राजकीय पक्षांशी आमचे संबंध आहेत अशी माहिती देण्यासाठी आम्हाला भाग पाडलं गेलं, असं ५ आरोपींनी म्हटलं आहे.

न्यायालयाने या पाचही जणांचे म्हणणे ऐकले असून यावर पोलिसांकडून उत्तर मागवले आहे. तसेच पुढील सुनावणीसाठी १७ फेब्रुबारी ही तारीख दिली आहे.

पोलिसांकडून मिळालेल्या वागणुकीबाबत या पाचही आरोपींनी संयुक्त याचिका दाखल केली आहे. सहावी आरोपी नीलम आझादने देखील असेच आरोप करत अर्ज दाखल केला आहे. मात्र तिचा अर्ज न्यायालयात प्रलंबित आहे. पॉलीग्राफ/नार्को/ब्रेन मॅपिंग दरम्यान मला विरोधकांशी संबंध असल्याचे म्हणण्यासाठी माझ्यावर दबाव टाकला गेला असं तिने म्हटलं आहे.