Khushbaaz Singh Jattana accident details Sonipat expressway : पंजाब काँग्रेसमधील दिग्गज नेते खुशबाज सिंह जट्टाना यांचा गुरुवारी संध्याकाळी भीषण रस्ते अपघातात मृत्यू झाला. हरियाणातील सोनीपत जिल्ह्यातील कुंडली भागात एक्सप्रेस वेवर भीषण अपघाताची घटना घडली. ररस्त्याच्या कडेला उभ्या असलेल्या जट्टाना यांच्या एसयूव्ही (SUV) गाडीला एका भरधाव ट्रकने जोरात धडक दिली. या अपघातात जट्टाना यांच्यासह त्यांच्या चालकाचाही मृत्यू झाला आहे.

स्थानिक मीडियाने दिलेल्या माहितीनुसार, खुशबाज जट्टाना हे कुंडली-गाझियाबाद-पलवल एक्सप्रेसवेवरून जात होते. यावेळी त्यांच्या गाडीचे टायर पंक्चर झाले. गाडी रस्त्याच्या कडेला उभी करून टायर बदलण्याचे काम सुरू होते. त्याचवेळी मागून आलेल्या एका ट्रकने त्यांच्या गाडीला जोरदार धडक दिली. या भीषण धडकेत खुशबाज सिंह जट्टाना (४५) आणि त्यांचे चालक परमिंदर सिंह यांचा जागीच मृत्यू झाला. तर त्यांचा सुरक्षा रक्षक गंभीर जखमी झाला आहे.

अपघातानंतर ट्रक चालक घटनास्थळावरून फरार झाला आहे. पोलिसांकडून या प्रकरणी गुन्हा दाखल करण्यात आला आहे. ट्रक चालकाचा पोलिसांकडून कसून शोध घेतला जात आहे. सीसीटीव्ही आणि इतर माहितीच्या आधारावर पोलिसांनी ट्रक चालकाची ओळख पटवली असून त्याच्या अटकेसाठी पथक रवाना करण्यात आले आहे. अपघात प्रकरणाचा पोलिसांकडून कसून तपास केला जात आहे.

खुशबाज जट्टाना यांनी काँग्रेसकडून २ वेळा विधानसभा निवडणूक लढवली होती. २०१७ आणि २०२२ मध्ये पंजाबच्या तलवंडी साबो मतदारसंघातून ते विधानसभेच्या रिंगणात उतरले होते. पण त्यांना दोन्ही वेळा पराभवाचा सामना करावा लागला. ते बठिंडा ग्रामीण जिल्हा काँग्रेसचे अध्यक्ष म्हणून कार्यरत होते. पण काळाने घाला घातला अन् त्यांचा अपघाती मृत्यू झाला.

खुशबाज जट्टाना यांच्या निधनामुळे पंजाब काँग्रेसमध्ये मोठी शोककळा पसरली आहे. पंजाब काँग्रेसचे प्रदेशाध्यक्ष अमरिंदर सिंह राजा यांनी दुख व्यक्त केले. ते म्हणाले की, पक्षाने एक उमदा आणि ऊर्जावान तरुण नेता गमावला आहे. दरम्यान, विधानसभेतील विरोधी पक्षनेते प्रताप सिंह बाजवा यांनीही जट्टाना यांना श्रद्धांजली वाहिली असून हे पक्षाचे मोठे नुकसान असल्याचे म्हटले आहे.